20 августи 2025 дар хабарнигорон дар Муассисаи давлатии «Маркази барномаҳои байналмилалӣ» бо донишҷӯёни тоҷикистонӣ, ки тибқи Стипендияи байналмилалии Президенти Тоҷикистон «Дурахшандагон» дар донишгоҳҳои муътабари ҷаҳон таҳсил мекунанд, суҳбат намуда, аз раванди таҳсил, мушкилоти мавҷуда маълумот ба даст оварданд.
Рамазон Одиназода, директори Муассисаи давлатии «Маркази барномаҳои байналмилалӣ» мегӯяд, онҳо ҳавасманд ҳастанд то ВАО дар бораи ин барнома бештар иттилоъ пахш кунад то волидайн дар бораи стипендияи мазкур шартҳои он маълумот дошта бошанд. Ба таъкиди роҳбари Маркази барномаҳои байналмилалӣ довталабон бояд сатҳи забондонии худро тақвият дода, сертификатҳои байналмилалии TOEFL, IELTS, Duolingo ва ғайраро дастрас намоянд.
Соли таҳсили 2024–2025 тариқи стипендияи «Дурахшандагон» 131 довталаб ғолиби озмун гардиданд, ки аз онҳо 105 нафар ба донишгоҳҳои кишварҳои пешрафтаи ҷаҳон (ИМА, Британияи Кабир, Канада, Олмон, Россия ва дигарон) сафарбар шуданд. Ҳоло 25 нафар дигар дар ҳоли анҷоми марҳилаҳои ниҳоии ҳуҷҷатгузорӣ қарор доранд.
Ёдовар мешавем, ки 23 июни соли 2025 марҳалаи якуми озмуни довталабон барои дарёфти Стипендияи байналмилалии Президенти Ҷумҳурии Тоҷикистон “Дурахшандагон” доир гардида буд.
Озмун барои дарёфти Стипендияи байналмилалии Президенти Ҷумҳурии Тоҷикистон “Дурахшандагон” тибқи тартиби муқарраркардаи Ҳукумати Ҷумҳурии Тоҷикистон аз ду марҳала иборат аст. Марҳилаи аввали онро барои дараҷаи бакалавр ва мутахассис Маркази миллии тестии назди Президенти Ҷумҳурии Тоҷикистон дар шакли тест ва марҳилаи баъдиро аъзои Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷӣ дар шакли суҳбат баргузор мекунанд.
Имсол тибқи маълумоти пешниҳодкардаи Муассисаи давлатии “Маркази барномаҳои байналмилалӣ” барои иштирок дар озмуни мазкур 469 нафар вобаста ба 4 гурӯҳи ихтисосҳо – 1-ум (табиӣ ва техникӣ), 2-юм (иқтисод ва география), 3-юм (филология, педагогика ва санъат) ва 5-ум (тиб, биология ва варзиш) ҳуҷҷат супорида буданд.
Довталабон мегӯянд, як мушкили асосӣ — ба таъхир афтодани раводид барои таҳсилашон дар кишварҳои Аврупо ва Амрико аст ва умедворанд бо роҳҳои дипломатӣ роҳҳал пайдо мекунад.
Маркази барномаҳои байналмилалӣ бо қарори Ҳукумати кишвар соли 2008 таъсис ёфта, ҳадафи он интихоби довталабони лаёқатманд ва сафарбар кардани онҳо ба донишгоҳҳои хориҷӣ дар асоси стипендияҳои давлатӣ, созишномаҳои байниҳукуматӣ, грантҳои байналмилалӣ ва квотаҳои таҳсилӣ мебошад.
Аз соли 2022 то имрӯз бо 17 донишгоҳи пешрафтаи Аврупо ва Амрико шартномаҳои нави ҳамкорӣ ба имзо расидаанд, ки шароити таҳсил ва будубоши донишҷӯёни тоҷикро осонтар мегардонанд.
