Муассиси Telegram Павел Дуров омодагии худро барои шаҳодат додан дар бораи дахолати эҳтимолии беруна ба интихоботи президентии Руминия изҳор намуд.
Паёми соҳибкор посух ба раҳбари мухолифини миллатгарои «Иттиҳод барои ваҳдати руминиҳо» Ҷорҷе Симион буд, ки дар мубориза барои мақоми сарвари давлат ба номзади мустақили аврупогаро Никушор Дан роҳ дод. Сиёсатмадори шикастхӯрда бар асоси дахолати берунии бозигарони давлатӣ ва ғайридавлатӣ аз бекор кардани натиҷаҳои интихобот даъват ба амал овард.
«Ман омодаам биёям ва шаҳодат диҳам, агар ин ба демократияи Руминия кумак кунад.», — навиштааст Дуров.
Шаҳрдори Бухарест Никушор Дан дар интихоботи президентии Руминия 18 май пирӯз шуд. Дан ҷонибдори ҳамгироӣ ба Иттиҳоди Аврупову НАТО ва идомаи кумак ба Украина аст. Овоздиҳӣ бо ҳузури зиёди интихобкунандагон ва дар заминаи иттиҳомот дар бораи дахолати беруна аз Русия ва, тавре ки Дуров ногаҳон изҳор дошт, аз Фаронса сурат гирифт.
Дар рӯзи даври дуюми интихобот, муассиси Telegram сардори хадамоти иктишофии Фаронса Никола Лернерро дар кӯшиши таъсир расонидан ба интихобот дар Руминия муттаҳам кард. Ба гуфтаи ӯ, гӯё ӯ хоҳиш кардааст, ки каналҳои консервативии Руминия баста шаванд, то таъсири Симион ва ҳизби ӯ маҳдуд карда шавад. Вазорати корҳои хориҷии Фаронса ин иддаоҳоро қалбакӣ ва беасос номид.
