Пешниҳоди пора ё инъом барои дарёфти кумак ҷурм аст

Расондани кумакҳои унвонии иҷтимоӣ ва қабули қарор барои ба таъин намудани кумакпулӣ бояд одилона сурат бигирад. Кормандони сатҳи ҷамоатҳои шаҳраку деҳот ва ҳам кормандони масъул дар раванди муайянсозии ниёзмандии оилаҳо бояд шаффофиятро риоя намоянд.
Ариза дар бораи таъин намудани кумаки унвонии иҷтимоӣ, маълумотнома дар бораи ҳайати оилаи камбизоат ва маълумот дар бораи даромад ва молу мулки ҳамаи аъзои оила бо имзои раис ё котиби ҷамоат ё сардори идораи манзилию коммуналӣ тасдиқ карда мешавад, ки дар доираи салоҳияти худ саҳеҳии маълумоти пешниҳодшударо месанҷанд ва ба дурустии онҳо масъул мебошанд.
Додани инъому пора барои тасдиқи ин ҳуҷҷатҳо ҷурм аст. Агар барои пур кардани ариза ё маълумотнома маблағ талаб гардад, рад кунед, зеро, он ройгон буда, хонапурии он хеле соддаву осон аст ва шумо мустақилона онро метавонед анҷом диҳед. Зеро, дар ин ҳуҷҷатҳо маълумоти хешро зикр мекунед.
Тибқи Тартиби таъин намудани кумакпулии унвонии иҷтимоӣ раисони кумитаҳои маҳалла, шӯроҳои ҷамъиятӣ ва сохторҳои дигари ғайрибуҷетии маҳаллӣ барои ташкили корҳои фаҳмондадиҳӣ ва таъмини шаффофияти таъини кумаки унвонии иҷтимоӣ бояд ҷалб гарданд.
Шахс баъд аз пешниҳоди ариза ва замимаи дигар ҳуҷҷатҳо барои дарёфти Кумакҳои унвонии иҷтимоӣ онро пайгирӣ намояд.
Ҷамоатҳои шаҳраку деҳот, идораҳои манзилию коммуналӣ ва кумитаҳои маҳаллӣ баъди қабул аризаҳои шаҳрвандон дар мӯҳлати на дертар аз 10 рӯз ин ҳуҷҷатҳоро ба мақомоти маҳаллии ҳифзи иҷтимоӣ бояд супоранд.
Мақоми маҳаллии ҳифзи иҷтимоӣ ариза ва маълу¬мот¬нома дар бораи ҳайати оила, маълумот дар бораи даромад ва молу мулки ҳамаи аъзои оила ва мушахасоти шиносномаи аризадиҳандаро барои муайян намудани нишондиҳандаи умумии сатҳи некӯаҳволии оила дар мӯҳлати на дертар аз 10 рӯз ба махзани ягонаи маълумоти низоми иттилоотии кумаки унвонии иҷтимоӣ ворид мекунад.
Агар сатҳи некӯаҳволии оила ба меъёри муқарраршуда ҷавобгӯ набошад, кумаки унвонии иҷтимоӣ таъин карда намешавад.
Қарор дар бораи таъин ё рад намудан кумаки унвонии иҷтимоӣ дар натиҷаи коркарди маълумоти ба махзани ягонаи низоми иттилоотии барномаи кумаки унвонии иҷтимоӣ воридшуда то санаи 10 моҳи оянда қабул гардида, дар ин хусус мақоми маҳаллии ҳифзи иҷтимоӣ дар муддати 10 рӯз ба аризадиҳанда хабарномаи хаттӣ ва ё электронӣ (паёмак) ирсол менамояд.
Умедворем, маълумот муҳим буд. Навиштани шарҳ, гузоштани лайкро фаромӯш накунед.