Вазорати корҳои дохилии Русия баъд аз ирсоли нотаи Қирғизистон рафтори кормандонашро дар ҳаммоми «Бодрост» дуруст шумурдааст.
«Пулиси пойтахт ҳангоми гузаронидани «чорабиниҳо барои пешгирии муҳоҷирати ғайриқонунӣ» дар ноҳияи Тимирязевскии Маскав нисбат ба шаҳрвандони Қирғизистон амалҳои ғайриқонунӣ содир накардааст.»,- омадааст дар иттилоияи Раёсати корҳои дохилии Вазорати корҳои дохилӣ дар шаҳри Маскав , ки 14 апрел нашр шуд.
Ба иттилои ин ниҳод, «кормандони пулиси Маскав якҷо бо ФСБ ва Росгвардия рӯзи 10 апрел амалҳои ғайриқонунии шаҳрвандони хориҷиро пешгирӣ карда, бинои ҷамъиятӣ дар ноҳияи Тимирязевскии пойтахтро тафтиш кардаанд.»
«Дар натиҷа, 59 шаҳрванди хориҷӣ барои тафтишот ба ШКД интиқол дода шуданд, ки онҳо тавассути захираҳои иттилоотии Вазорати корҳои дохилии Русия тафтиш карда шуданд. Нисбат ба 25 нафари онҳо протоколҳои ҳуқуқвайронкунии маъмурӣ аз рӯи моддаи 18.8 Кодекси ҳуқуқвайронкунии маъмурии Федератсияи Русия (вайрон кардани қоидаҳои вуруд ё реҷаи будубоши шаҳрванди хориҷӣ) тартиб дода шудааст, ки ҷарима ва аз ҳудуди Русия ихроҷ карданро пешбинӣ мекунад.
Шаш нафар аз боздоштшудаҳо «фаъолияти меҳнатиро бидуни бастани шартномаҳои меҳнатӣ анҷом медоданд», ки дар натиҷа «масъалаи ба ҷавобгарии маъмурӣ кашидани корфармои онҳо аз рӯи моддаи 18.15 Кодекси ҳуқуқвайронкунии маъмурии Федератсияи Русия ҳал карда мешавад».
Рӯзи душанбе, 14 апрел, Вазорати корҳои хориҷии Қирғизистон ба сафири фавқулодда ва мухтори Русия дар Бишкек Сергей Вакунов дар робита ба боздошти оммавии шаҳрвандони Қирғизистон дар ҳудуди маҷмааи ҳаммоми «Бодрост» дар Маскав ёддошти расмӣ ирсол кард.
