Ноболиғ аз модар гирифта шуд

Ҳ.У-и 15-сола барои содир намудани ҷиноятҳои дуздӣ ва мунтазам машғул шудан ба оворагардию талбандагӣ, дастгир карда шуд.
Раёсати ВКД дар шаҳри Душанбе хабар медиҳад, ки санҷиши кормандони самти кор бо ноболиғон муайян намуд, ки модари ноболиғ дар таълиму тарбияи фарзанди худ бемасъулиятии ҷиддӣ зоҳир намуда, ӯро ба оворагардию талбандагӣ маҷбур сохтааст.
Аз беназоратии модар истифода бурда, ноболиғ силсила ҷиноятҳои дуздиро содир карда, шабона ба оворагардӣ ва дар роҳҳои мошингард ба талбандагӣ машғул шудааст.
Бо назардошти ҳолатҳои мазкур, нисбат ба модари ноболиғ С.М. моддаи 73 Кодекси оилаи Ҷумҳурии Тоҷикистон, ки гирифтани кӯдакро бе маҳрум кардани волидон аз ҳуқуқи падару модарӣ иҷозат медиҳад, татбиқ карда шуд.
Бо ҳалномаи Суди н.Сино ноболиғ Ҳакимов У., аз модараш гирифта шуда, дар Муассисаи махсуси таълимӣ ҷойгир карда шуд. Ин тадбир метавонад дар таълиму тарбияи наврас мусоидат намояд.
Ба иттилои шаҳрвандон расонида мешавад, ки минбаъд милитсияи пойтахт бо мақсади тарбияи дурусти наврасон фаъолиятро дар ин самт дучанд намуда, волидайне, ки аз уҳдаи тарбияи фарзанди худ баромада наметавонанд, дар асоси тартиби муқаррарнамудаи қонунгузорӣ кӯдак аз дасти онҳо гирифта шуда, дар муассисаҳои махсуси таълимӣ ҷойгир карда мешаванд.