Муин Ғафуров, размикори тоҷик дар муҳорибаҳои омехта (ММА), дар мусобиқоти UFC 311 дар вазни сабуктарин Риня Накамураи ҷопониро шикаст дод.
Ин рақобат шоми 19-уми январ дар шаҳраки Инглвуди Иёлати Калифорнияи Амрико баргузор шуд.
Бо қарори якдилонаи доварон дар се раунд (30-27, 30-27, 30-27) размикори тоҷик пирӯз дониста шуд. Ҳамин тариқ, Муин Ғафуров ғалабаи 20-уми худро дар муҳорибаҳои омехта ба даст овард. Барои Риня Накамура бошад, ин аввалин бохт дар корномааш ба шумор меравад.
Муин Ғафурови 28-сола дар ММА ҳамагӣ 26 қувваозмоӣ анҷом дода, дар 20-тоаш пирӯз шуда, дар 6-тоаш шикаст хӯрдааст, аз он ҷумла дар UFC (Ultimate Fighting Championship) аз чаҳор рақобат дар дутоаш ғолиб омада, дутоашро бохтааст. Вазнаш 61 килограмм ва қадаш 1 метру 70 сантиметр мебошад.
Риня Накамураи 29-сола бошад, дар муҳорибаҳои ММА ҳамагӣ 10 қувваозмоӣ карда, дар яктоаш шикаст хӯрдааст, аз он ҷумла дар UFC ду пирӯзӣ ва як бохт дорад. Қадаш 1метру 70 сантиметр, вазнаш 61 килограмм аст.
