Ҳисоби андози амволи ғайриманқул хеле осон аст. Зарур нест, ки барои ин кор аз касе кумак пурсед ё ба нозироти андоз ҳозир шавед.
Ба сомонаи Кумитаи андоз (andoz.tj) ворид гардида, дар қисмати поёнии сомона бахши “Ҳисобкунаки андоз”-ро пайдо ва соддаву роҳат андози амвол ва дигар навъи андозҳоро ҳисоб намоед.
Дар ин бахш ҳисоби “андоз аз даромад”, “воситаи нақлиёт”, “амвол”, “истифодаи замин”, “патент” ва “Андози ягона” имкон дорад.
Мо дар видео раванди ҳисобкунии ин навъи андозро намоиш медиҳем, ки барои шумо муфид хоҳад буд.
Объектҳои андозбандии андоз аз молу мулки ғайриманқул хонаҳои истиқоматӣ, ҳуҷраҳо, бӯстонсаройҳо, гаражҳо ва дигар биною иморату иншоотҳое мебошанд, ки ҳамчун молу мулки ғайриманқул эътироф шудаанд. Манбаи андоз масоҳати ҳамаи ошёнаҳои молу мулки ғайриманқул (ба истиснои иншоотҳо) мебошад, ки бо дарназардошти зарибҳо тасҳеҳ шудааст. Манбаи андоз барои иншоотҳо масоҳати замине ба ҳисоб меравад, ки дар амал онҳо ишғол намудаанд. Ҳангоми ҳисоб кардани манбаи андоз масоҳати ошёнаи якум, таҳхона, болохона, ошёнаҳои 2 — 5 ва ғайра тартиботи хос муқаррар шудааст.
Меъёри андоз аз молу мулки ғайриманқул дар ҳаҷми карат аз меъёри андози замин муқаррар карда шудааст; молу мулки ғайриманқул, дар шакли бинои истиқоматӣ — ба андозаи 15-карата; молу мулки ғайриманқул барои мақсадҳои тиҷоратӣ, нуқтаҳои хӯроки омма ва хидматрасонии маишӣ — ба андозаи 60-карата ва ғайра.
Андозсупоранда имконият дорад дар нуқтаҳои хизматрасонии “Амонатбонк” маблағи андоз аз объектҳои ғайриманқулро бо истифода аз кортҳои пардохтии бонкӣ (“Visa”, “MasterCard” ва “Корти миллӣ”) пардохт намояд. Дар баробари пардохти ғайринақдии маблағи андозҳои мазкур бо истифодаи кортҳои пардохти бонкӣ, тавассути сомонаи Кумитаи андоз хизматрасонии интернет-эквайринг ҷорӣ гардидааст. Мавриди истифода қарор додани хизматрасонии эквайринг ба субъектҳои хоҷагидор имконият дод, ки тавассути кортҳои пардохтӣ маблағи андозҳоро дар шакли ғайринақдӣ пардохт намоянд.
Акси асосӣ аз шабакаи интернет
