Бобоҷон Одинаев cоли 7-ум аст, ки бо аҳли оилааш деҳқонӣ мекунад. Қитъаи хоҷагии деҳқониаш 1 га заминро ташкил медиҳад, ки дар он 20 гармхона бунёд намуда, дар 10 адади он парвариши қулфинайро ба роҳ мондааст. Ӯ мегӯяд, навъи қулфинайи русиро парвариш мекунад, зеро, барои содирот муносиб аст.
“Дар як чинак то 300 кг ҳосил ҷамъ меоварем. Харидорон назди мо омада маҳсулотро харидорӣ мекунад. Аз охирҳои моҳи март то авоили моҳи май мо ҳосилро ҷамъоварӣ мекунем.”,-мегӯяд ин деҳқон.
Хонаводаи Одинаевҳо дар ҷамоати шаҳраки Кирови ноҳияи Вахш аз субҳ то шом кор мекунанд. Бобоҷон Одинаев қабл аз ташкили хоҷагии деҳқонӣ барои пайдо кардани кори муносиб ва пул ба Русия мерафт, вале бо мушкилиҳое мисли пайдо накардани ҷойи кори муносиб, сари вақт нагирифтани ҳақмузд, ҳуҷҷатгузорӣ рӯ ба рӯ мешуду дурӣ аз зану фарзанд азияташ медод…
«Тақрибан 50 ҳазор сомонӣ аз бонк қарз гирифтем. Арматуру матоъи плостик (клеёнка) ва тухмҳои хушсифат харидорӣ карда, ба деҳқонӣ оғоз кардам. Шабу рӯз заҳмат кашида, қарзи бонкро пардохтем ва вазъи иқтисодии оилаамонро низ беҳ сохтем.»,- нақл кард Б. Одинаев.
Ин деҳқон таъкид мекунад, ки парвариши қулфинай заҳмат ва харҷи зиёдро талаб мекунад, вале даромади хуб низ дорад. Ҳоло ягона манбаи даромади хонаводааш аз ҳисоби як га замин аст. Бо ташкили хоҷагии деҳқонӣ фарзандонро аз машаққати муҳоҷират низ раҳо кардааст.
Аксарияти сокинони ҷамоати шаҳраки Кирови ноҳияи Вахш ба кишту парвариши қулфинай машғул ҳастанд. Ҳамасола аз авалинҳо шуда, маҳсулоташонро ба бозор мебароранд. Вахш аз ноҳияҳои овозадор дар парвариш ва содироти қулфинай дар саросари вилояти Хатлон маҳсуб мешавад.
Амонҷони Муҳиддин
