Юлдуз Пардаева ягона соҳибкор дар ноҳияи дурдасти вилояти Хатлон-Носири Хусрав аст, ки истеҳсоли маҳсулоти ширӣ, аз қабили қаймоқу сметана ва қурутро ба роҳ мондааст. Маҳсулоти корхонаро бо исми хеш-«Юлдуз» банду баст карда, ба бозор арза мекунад.
Сметанаи «Юлдуз» аз ҷиҳати экологӣ тоза ва бо технологияҳои муосир коркард шуда, дастраси харидорон мегардад.
Юлдуз Пардаева 30 сол дорад. То соли гузашта дар яке аз муассисаҳои таълимии ноҳия аз фанни забони русӣ дарс мегуфт. Бо кумаку дастгирии падар рӯ ба соҳибкорӣ овард. Аксарияти мардуми дурдасти ноҳияи Носири Хусрав аз ҳисоби кишоварзию чорводорӣ рӯзгори хешро таъмин мекунанд. Дастрасӣ ба шир барои Юлдуз Пардаева мушкил нест.
Феълан Юлдуз дар як рӯз то 300 литр ширро аз сокинони деҳот харидорӣ мекунад. Фасли баҳору тобистон, ки чорвои мардум ба саҳро мебарояд, корхонаи Юлдуз 500 литр ширро коркард мекунад.
«Аз 300 литр шир 15 кг қаймоқ, 80 литр сметана ва як миқдор чакка ба даст меорем. Тариқи таҷҳизоти махсус аз чакка қурут омода карда, дар бозору мағозаҳо мефурӯшем. Як кг қурутро 30 сомонӣ пешниҳод мекунем.»,-нақл кард Юлдуз.
Ноҳияи Носири Хусрав гармтарин минтақа дар вилояти Хатлон аст, ки ҳарорати он дар фасли тобистон ба 50 дараҷа мерасад. Ба роҳ мондани коркарди маҳсулоти ширрӣ дар ин ноҳия осон нест. Вале Юлдуз Пардаева мегӯяд, падараш дар доираи як бурсия аз шарикони рушд соҳиби нуқтаи қабули шир гардид.
Мусоҳиби мо мегӯяд, дар аввал харидори маҳсулоташ хеле кам буд. Вале ӯ рӯҳафтода нашуд, балки барои зиёд шудани мизоҷонашон талош кард. Акнун маҳсулоти истеҳсолшудаи «Сметана Юлдуз» «Қурути Юлдуз» дар мағозаҳои ноҳияҳои Носири Хусраву Қубодиён фурӯхта мешавад.
«Дар баробари ману бародарам боз 3 зани хонашинро ба кор таъмин кардам. Як қутии сметанаро дар мағозаҳо 4 сомонӣ мефурӯшам. Харидораш хуб аст, фурӯшандаҳо зуд-зуд фармоиш медиҳанд. Дар ноҳия ягона нафаре ҳастам, ки истеҳсоли маҳсулоти ширриро ба роҳ мондаам.»,- мегӯяд ин соҳибкорзан.
Гулчеҳра Узоқова дар ноҳияи Носири Хусрав соҳиби мағозае ҳаст, ки маҳсулоти истеҳсолшудаи корхонаи Юлдузро мефурӯшад. Ин мағозадор таъкид мекунад, ки қаймоқу сметанаи «Юлдуз» нисбатан арзон дастрас гардида, аз ҷиҳати экологӣ тоза ва тамъаш фарқунанда аст.
Ба қавли Юлдуз, ин тиҷорат аз як тараф барои боло бурдани иқтисодиёти хонавода кумак мекунад, аз тарафи дигар қимати маҳсулотро дар минтақаи онҳо коҳиш дода, воридоти маҳсулотро аз хориҷ коҳиш медиҳад.
Акнун Юлдуз Пардаева ният дорад, ки иқтидори маҳсулоти коргоҳашро зиёд намуда на танҳо мағозаҳои ноҳияҳои атрофро, балки шаҳрҳои Бохтару Душанберо низ таъмин намояд.
Амонҷон Муҳиддинов
