Лутфулло Элмуродов Донишкадаи омӯзгории шаҳри Панҷакентро бо ихтисоси таърих ва бостоншиносӣ хатм намуда, ҳоло магистранти Донишгоҳи давлатии Алтай дар шаҳри Барнаул аст. Ӯ давраи асримиёнагии Панҷакенти қадимаро меомӯзад ва соли панҷум аст, ки дар тадқиқотҳои бостоншиносӣ ширкат дошта, ният дорад ин ёдгориро ба ҷаҳониён муаррифӣ намояд.
Ҳамчунин қаҳрамони мо дар “YouTube”, “Instagram” ва “Telegram” ба ҳамватанонамон забони русӣ меомӯзад. Ин хадамоти ӯ дар шабакаҳои иҷтимоӣ ройгон ва пулакӣ ҳастанд. Ҳоло дар “Instagram” зиёда аз 70 ҳазор обуначӣ дошта, ба онҳо доир ба муҳимияти забономӯзӣ маъмулот медиҳад.
Мо бо Лутфулло дар барномаи “Бол” доир ба таҳсил, таърих, шабакаҳои иҷтимоӣ ва омӯзишу омӯзонидани забони русӣ суҳбат кардем.
«Мушоҳида мекардам, ки бархе ҳамватанони мо дар Русия кору зиндагӣ мекунанд, вале мутаассифона, забони русиро намедонанд. Бинобар ин, хостам донишҳои худро дар бораи ин забон ба дигарон қисмат намоям.», — гуфт Лутфулло.
Ӯ ҳамарӯза тариқи “YouTube”, “Instagram” ва “Telegram” маводи омӯзишӣ нашр мекунад, аммо ба бовари ӯ, барои омӯхтани забони русӣ ин маълумот кам аст. Яъне, маълумоти ироашаванда барои забономӯзон маводи иловагӣ метавонад бошад.
«Асосан наворҳои омӯзиши бо тартиби муайян дар “YouTube” муайян мавҷуданд. Дар “Instagram” наворҳои тӯлонӣ натиҷаи мусбат намедиҳад. Ба ин хотир, ҳоло дар он ба омӯзонидани калимаву ибора ва ҷумлаҳои лозимию серистеъмол машғул ҳастем.», — илова кард ӯ.
Лутфулло ҳамроҳ бо як муаллимаи забони англисӣ бо номи Даря охири моҳи гузашта дар “YouTube” ва “Telegram” дарсҳои онлайнии худро оғоз кард. Дарсҳо бо барномаи “GOOGLE MEET” мегузарад. Айни ҳол ҳудуди 30 нафар дар ду гуруҳ ин забони хориҷиро меомӯзанд. Ҳамаи онҳо шаҳрванди Тоҷикистон буда, бархе дар Русия қарор доранд.
«Ба наздикӣ китоби дуюмам бо номи “Русский язык для начинающих” бо теъдоди 400 нусха ба дасти чоп мерасад. Китоби мазкур аз 319 саҳифа иборат буда, 60 дарсро фаро мегирад. Китоб дорои грамматикаи пурраи забони русӣ, муколама дар 60 мавзӯъ ва 4000 ҳазор луғат мебошад.», — иттилоъ дод Лутфулло.
Лутфулло донандаи забони англисиро низ меомӯзад ва дорандаи гувоҳномаи зинаи “Pre-intermediate” аст.
Интихоби риштаи бостоншиносӣ таваккалӣ набуда, даврони мактабхонӣ таърихро дӯст медоштааст ва дар олимпиадаҳои мактабӣ, шаҳрӣ ва ҷумҳуриявӣ иштирок мекардааст.
«Ҳамон шӯру шавқу маро ба Донишкадаи омӯзгории Панҷакент ва сипас ба Русия овард.»,-афзӯд ӯ.
Лутфулло моҳи декабри имсол ба дидорбинии волидонаш меояд ва тобистони соли оянда барои иштирок дар тадқиқотҳои бостоншиносӣ хоҳад омад.
Оянда дар Академияи миллии илмҳои Тоҷикистон ва макотиби олии кишвар фаъолият кардан мехоҳад.
Ҳафизуллоҳ Тоҳирӣ
