Нуралӣ Зиёев дар Дубай кору зиндагӣ мекунад. Ӯ риштаи муносибатҳои байналмилали Донишгоҳи миллии Тоҷикистонро хатм кардааст. Моҳи марти соли гузашта бо мақсади кору зиндагӣ ба Дубай рафт ва ҳоло дар яке аз ширкатҳои мошинфурӯшӣ ба ҳайси SMM кор мекунад, аксу наворҳо таҳия ва тариқи шабакаҳои иҷтимоӣ паҳн менамояд. Ӯ муддати як соли зиндагӣ дар Дубай аллакай дар 7 ширкат фаъолият доштааст.
“Дар Дубай ҳамеша аз кори хурд оғоз кардан беҳтар аст. Баъзеҳо тамоман тасаввури дигар доранд. Ибтидо муҳоҷирон 800-1000 доллар дарёфт мекунанд ва ин маблағ ба иҷораву хӯрок мерасад. Бо гузашти вақт ва андӯхтани таҷриба корҳои беҳтар пайдо мешаванд. Зеро, таҷрибаи корӣ надоранд. Барои дар Дубай кори хуб пайдо намудан таҷрибаи кор дар ширкатҳо зарур аст.”,-нақл намуд Нуралӣ.
Нуралӣ бар замми кори асосӣ ба муҳоҷирон, махсусан ба тоҷикон кумак мекунад то соҳиби ҷойи кори муносиб гарданд.
“Ман дар Instagram чӣ гуна ба Дубай омадану кор пайдо карданро меомӯзам. Ин корҳоро ройгон анҷом медиҳам, вале агар нафаре дарси иловагӣ мехоҳад он музднок аст. Масалан, барояш тарҷумаи мухтасари ҳол омода мекунам аз рӯйи ихтисосу ҳунараш дар муддати кӯтоҳ барояш кор меёбам.”, — илова кард ӯ.
Нуралӣ чандин нафарро соҳиби ҷойи кор намуда, ҳам музд гирифтаву ҳам ёрӣ ба ҳамватанонаш кардааст.
Ӯ бобати сайёҳату шиносоӣ ба Дубай роҳбаладӣ низ мекунад. Роҳнамоӣ мекунад, ки аз кадом бозор молу маҳсулот бояд харид, дар кадом минтақа хонаи иҷора гирифт ва амсол ин.
Ҳафизуллоҳ Тоҳирӣ
