Дастаи мунтахаби Тоҷикистон ба ҷамъомади дуҳафтаинаи тамринӣ-таълимӣ таҳти роҳбарии мутахассиси хорватӣ Петр Сегрт ба Дубай сафар мекунад то ба марҳилаи интихобии Ҷоми Осиё-2023 омода шавад.
Ба иттилои Кумитаи олимпии Тоҷикистон, дастаи мунтахаби Тоҷикистон 19 май пас аз анҷоми бозиҳои даври ҳаштуми лигаи олии кишвар ба Дубай сафар мекунад. Дар ин ҷамъомади таълимиву тамринӣ, ки то 3-юми июн идома менамояд, дастаи мо як бозии дӯстона ба нақша гирифтааст. Ҳарифи футболбозони мо дар бозии санҷишӣ рӯзҳои наздик муайян хоҳад шуд.
«Ҳайати мукаммали тими миллии Тоҷикистон барои ҷамъомади таълимиву тамринӣ дар Амороти Муттаҳидаи Араб, ки рӯзи 18 май эълон мешавад, 26 бозингарро дар бар мегирад. Аз ин шумора 23 бозингар ба дархости даста барои ширкат дар мусобиқаи интихобии Ҷоми Осиё-2023 шомил карда мешаванд.»-хабар медиҳад КОТ.
Дар марҳилаи интихобии Ҷоми Осиё-2023 тими миллии Тоҷикистон дар гурӯҳи «F» бо Мянмар (8 июн), Сингапур (11 июн) ва Қирғизистон (14 июн) бозӣ мекунад. Ҳамаи бозиҳои гурӯҳи «F» дар шакли мутамарказ дар Бишкек баргузор мешаванд. Ғолибони шаш гурӯҳи интихобӣ ва инчунин панҷ тими беҳтарини ҷойҳои дуюмро ишғолкарда ба марҳилаи ниҳоии Ҷоми Осиё-2023 роҳ меёбанд.
