Шакли кинотеатрии филми ”Аз миллион яке» (Один на миллион) аз тариқи шабакаи ютуб дастрас гардид. Маркази байналмиллалии рушди инсон «Само» ва Суғдсинамо тариқи саҳифаҳои ютубии хеш филмро нашр намуда, ҳушдор додаанд, ки онро нусхабардорӣ накунанд.
Муҳиддини Музаффар, коргардони филми мазкур ба «ҶОМ» гуфт, шакли бисёрсериягии он моҳи апрел дастрас хоҳад шуд.
Филми мазкур 1 — уми октябр дар шаҳри Москва, 2 — юми октябр дар шаҳри Қазон, 3 — юми октябр дар Новосибирск, 4 — уми октябр дар Екатеринбург, 5 — уми октябр дар Махаҷқалъаи Доғистон, 7 — уми октябр дар шаҳри Алма-Ато ва 21 – уми октябр дар шаҳри Тошканд ба намоиш гузошта шуда буд.
Рӯзи 16 — уми октябр бахшида ба Рӯзи синамои тоҷик нахустнамоиши филм дар қасри Суруш бо иштироки созандагон ва ҳунармандони филм сурат гирифта, баъдан дар як қатор шаҳрҳои Тоҷикистон намоиш дода шуд.
Ин филми ҳунарии 95 дақиқагӣ солҳои 2019 ва оғози соли 2020 дар кишварҳои Тоҷикистон, Русия, Қазоқистон, Қирғизистон ва Амрико дар ҳамкорӣ бо маркази продюсерии “Футура Магнум” ва ситораҳои синамои ин кишварҳои пасошӯравӣ наворбардорӣ шудааст. Муҳиддини Музаффар мегӯяд, бо наворгирии филми “Пайраҳаи мураббӣ” дар шакли русӣ “Один на миллион” талош кард образи чеҳраи тоҷикеро, ки дар гузашта дар чанде аз кишварҳо ҳамчун муҳоҷир аксаран мешинохтанд то ҷое иваз кунад.
“Ин филм дар бораи як тоҷике аст, ки азобҳои зиёдро пушти сар карда тавонистааст, ки дар дунё худашро муаррифӣ кунад ва ҳазорон пайрав дошта бошад. Тавонистааст, ки ҳазорон нафарро аз қарз барорад. Мақсади асосии мо иваз кардани образи тоҷике, ки ҳамчун аробакашу сохтмончӣ мешиносанд бо ин роҳ иваз кардан ва як хишт гузоштан аст”.
Филм дар асоси воқеаҳои реалӣ наворбардорӣ шудааст. Қисме аз филм бозгӯйи солҳои 1978-и деҳаи кӯҳистонии Дарғи ноҳияи Айнӣ аст, ки дар як хонаводаи оддӣ тифле тавлид мешавад ва ба ӯ Саидмурод ном мегузоранд. Ҳамагӣ дар яксолагии кӯдак падараш ба таври фоҷиавӣ мефавтад ва тарбияи ӯ ба дӯши модар меафтад.
