Маркази омӯзишии “Ilmhona” дар се соли фаъолият беш аз 300 барномасозу дизайнер омода кардааст.
Соли 2018 гурӯҳе аз ҷавонони тоҷик маркази омӯзишиеро боз карданд, ки дар муҳлати кӯтоҳ барномасози касбии компютер омода мекунад.
Моҳи июни соли 2018 Фардавс Абдуназаров, Шуҳрат Шарифов ва Фаррух Умарӣ маркази омӯзишии “Ilmhona”-ро дар шаҳри Душанбе таъсис доданд.
Фаррух Умарӣ, Директори маркази омӯзишии “Ilmhona” мегӯяд, идеяи таъсиси чунин марказ баъди хатми донишгоҳи Оксфорд дар зеҳнаш пайдо шуд:
“Замони таҷрибаомӯзиам дар Исроил мушоҳида намудам, ки ин кишвар барномасозонро аз давлатҳои гуногун даъват мекунад ва бо ҷойи кору маоши хуб таъмин менамояд. Он вақт дарк кардам, ки дар замони муосир ин касб хеле зарурӣ аст. Ба ин хотир, тасмим гирифтам дар Тоҷикистон як маркази омӯзишӣ таъсис диҳам.”
Аз замони таъсиси марказ зиёда аз сесад нафар “Ilmhona”-ро хатм намудаанд, ки ҳудуди панҷоҳ нафари онҳо бо пешниҳоди “Ilmhona” дар ширкатҳои бонуфузи ватанию хориҷӣ ба ҳайси барномасоз ва дизайнер ба кори доимӣ таъмин шудаанд.
Маркази “Ilmhona” дар се равия мутахассис омода мекунад:
- Барномасозии WEB;
- Сохтани барномаҳои мобилӣ;
- Дизайн
Муҳлати таҳсил аз се то шаш моҳ буда, ҳамчунин маркази омӯзишии “Ilmhona” барои нафароне, ки бо баҳои аъло ин ҷоро хатм мекунанд, имтиёз медиҳад. Агар маҷмӯи холи донишҷӯ дар имтиҳон аз 96 то 100 бошад маблағи пардохтаи ӯ пурра баргардонида мешавад. Хонандае ки дар имтиҳон аз 90 то 95 хол ба даст меорад, дар ин сурат, ба ӯ сертификат ва 75 дарсади маблағи таҳсил бозпас дода мешавад. Хонандагоне ки аз 70 то 84 бал мегиранд, сертификати “Ilmhona”-ро соҳиб мегарданд. Онҳое ки аз 70 хол кам мегиранд, ба ӯ онҳо ҳатто сертификати марказ дода намешавад.
Фаррух Умарӣ мегӯяд, ҳамарӯза барои пешниҳоди мутахассис аз ҷониби “Ilmhona” муроҷиат зиёд аст. Амо на ҳама ҳамеша хоҳиши онҳо қонеъ карда мешавад, зеро, талабгорон хеле зиёданд.
Шакли таҳсил ҳузурӣ ва онлайн аст. Моҳи августи соли равон дар шаҳри Истаравшан маркази омӯзишии “Ilmhona” намояндагии хешро боз кард, ки ҳоло дар он ҷо панҷоҳ нафар таҳсил менамоянд. Масъулини Маркази омӯзишии “Ilmhona” талош доранд, ки дар дигар шаҳру навоҳии Тоҷикистон намояндагиии хешро ифтитоҳ кунанд.
Маркази мазкур ҳамкории густарда бо мактаби барномасозии Read School -и шаҳри Сан — Фарнсисикои Амрико дорад. Ҳамчунин борҳо масъулони ширкатҳои маъруфи дунё бо хонандагони Ilmhona мулоқот анҷом додаанд.
Фурқати Низом
