Савринисо бо омода кардани борхалтаҳои матоъгин истифодаи пакетҳои пластикиро кам карданист

Маводҳои пластикӣ ва полиэтиенӣ, ки аксар вақт мавриди истифодаи якдафъаина қарор дорад, барои муҳити зисти инсон мушкилот эҷод кардааст.

Муҳитшиносон мегӯянд, дар як сол беш аз 4 триллион пакети пластикӣ дар гардиш қарор мегирад, ки аз таъсири он ҳамасола ба 1 миллион паранда мерасад, ва ҳазорон ҷонварони баҳрӣ ва шумораи зиёди моҳиҳо ба нестӣ мерасанд.

Дар бархе кишварҳои аврупоӣ барои бастабандӣ ва пакетҳо андоз ҷорӣ гардидааст ва мардум аз баҳри пакетҳои пластикӣ гузашта ба истифодаи пакетҳои латтагин ва ё коғазӣ гузаштанд, аммо мо то ҳол дар кишвари мо аз пакетҳои пластикӣ васеъ истифода мекунему ба паёмади он намеандешем. Бар замми истифодаи зиёд, сифати онҳо низ хуб набуда, бо аввалин истифода канда шуда, дар кӯчаву хиёбонҳо партофта мешавад.

Дар чандин кишвари ҷаҳон фурӯшгоҳҳо барои ройгон додани пакетҳои пластикӣ ҷарима мешаванд. Вале дар оддитарин фурӯшгоҳи кишвари мо бо хариди 10 маҳсулот бароят 10 пакети пластикӣ ройгон медиҳанд.

Бо мақсади коҳиш додани истифодаи пластик, аз тарафи бархе сокинон, ташкилоту муассисаҳои дахлдор чораҳо андешида мешаванд.
Савринисо Ҳафизова роҳбари ташкилоти ҷамъиятии «Рушди кӯҳистон» дар ноҳияи Рашт буда, самти асосии фаъолияти ин ташкилот ба масъалаҳои экологӣ равона гардидааст.
Дар робита бо мушкилоти зикршуда аз тарафи роҳбари ташкилот иқдоми наҷибе роҳандозӣ шудааст.

Ин иқдом омӯзиши дӯхтани борхалтаҳои аз матоъ омадашуда миёни бонувони ноҳия мебошад.

Мақсад аз омӯзиши мазкур иваз намудани борхалтаҳои селофанӣ бо борхалтаҳои аз матоъ омадашуда унвон мешавад.

То имрӯз дар аксари минтақаҳои дурдасти ин ноҳия омӯзиши мазкур барои занон гузаронида шудааст. Илова бар ин, бонувони хонашин метавонанд чунин борхалтаҳоро омода намуда аз ҳисоби фурӯши онҳо ба буҷаи оилаи худ даромад оранд. Аз амалигардии ин иқдом 3 сол сипарӣ мешавад ва дар оянда низ идома меёбад.

Довуд Акобиров

ПИСАНД ОМАД? БО ДӮСТОНИ ХУД МУБОДИЛА КУНЕД!
Like
Love
Haha
Wow
Sad
Angry
Хабари баъдиро пайгирӣ кунед!
Close
Back to top button