Кандакорӣ ҳунари солхӯрдагон нест. Ҳатто ин ҳунарро наметавон комилан авлодӣ гуфт. Баъзе аз давраи туфулият рӯйи чуб бо корд ё таҷҳизоти монанд тасвире мекашанд.
Абумуслим Сафаровро ҳанӯз дар чаҳордаҳсолагӣ падараш ба Мактаби санъати бачагонаи шаҳри Бохтар бурд то ҳунареро, ки алоқмандаш ҳаст, аз худ намояд. Абумуслим ҳоло 17 сол дорад ва дар мактаби№38-и шаҳри Бохтар таҳсил мекунад:
“Дар оилаи мо касе чунин ҳунарро надорад. Баъди дарсҳо аз мактаби маъмулӣ фориғ гардида, ба мактаби санъати бачагона рафта, нозукиҳои ин касбро аз худ мекунам. Алакай ноновари хона низ шудаам. Бархе аз ҷавонону мардон баҳонаи набуди кор мекунанд, вале ман бо вуҷуди хонанда буданам, соҳиби нони худ ва ҳунар ҳастам.”,-мегӯяд Абумуслим Сафаров.
Абумуслим ҳар рӯз баъди дарс ба Мактаби санъати бачагона рафта, сандуқча, сандуқи калон, гулдон ва лавҳ месозад: “Як сандуқча дар як ё ду рӯз омода мешавад. Ба бозор бурда 30-40 сомонӣ мефурӯшем.”,-мегӯяд ӯ ва илова мекунад, ки сандуқчаҳои сохтаашро бештар навхонадорон барои гузоштани ҷавоҳирот харидорӣ мекунанд.
Сафаров мегӯяд, ҳунари кандакорӣ мушкил аст, вале дар навбати дигар барои соҳибкасб ному нон меорад: “Сандуқҳо бо асбобҳои махсус нақшгузорӣ мешаванд. Чанд намуд асбоб низ лозим аст. Ман ояндаи худро фик карда, хостам, ки ҳунаре дошта бошам, то оянда зиндагии худро сомон бахшам.”
Чанд тан аз ҳамсолони Абумуслим Сафаров низ дар Мактаби санъати бачагонаи шаҳри Бохтар кандакорӣ меомӯзанд. Беҳрӯз Олимов як сол шудааст, ки мактабро хатм кардааст. Алъон кори худро пайдо карда, зингаиашро беҳбуд бахшидааст. Ӯ ҳунари кандакориро аз худ намуда, ҳоло ба таҳияи сандуқҳои калонҳаҷм машғул аст.
Хуршед Аблоқулов, омӯзгори Мактаби санъати бачагонаи шаҳри Бохтар мегӯяд, ки тӯли 5 соли фаъолияташ ба садҳҳо шогирд ҳунари кандакориро омӯзонид. Ба гуфтаи ӯ, мардуми тоҷик расму оини аҷдодии худро ҳамеша пос медоранд. Сандуқу гавҳора зеби хонадони ҳар як тоҷику тоҷикистонӣ аст: “Мо бояд ҳунари кандакориро равнақ бахшем. Ба дигарон омӯзонем, нагузорем, ки берун аз кишвар омода ва ворид кунанд.”
Хуршед Аблоқулов ба сомонаи jom.tj гуфт, дар Мактаби санъати бачагонаи шаҳри Бохтар беш аз 20 нафар ҳунари кандакориро меомӯзанд ва муассиса талош дорад то сафи шогирдонро афзояд.
Амонҷон Муҳиддинов
