Маркази тиҷорати байналмилалӣ барои 34 мутахассиси корхонаҳои дӯзандагии Тоҷикистон баҳри беҳтар намудани фаъолияти дӯзандагон ва боло бурдани сатҳи маҳсулнокии кори онҳо давраҳои омӯзишӣ баргузор менамояд. Ин мутахассисҳо дар оянда ба сифати тренер донишҳои андӯхтаашонро ба ҳамкоронашон меомӯзанд. Давраҳои омӯзишӣ аз 22-юм то 27-уми феврал дар Душанбе ва аз 1-ум то 6-уми марти 2020 дар Хуҷанд баргузор мегарданд. Барномаи омӯзишӣ аз ҷониби коршиносони ширкати консалтингӣ аз Ҳиндустон – Skilift Consulting таҳия ва тадрис мешавад.
Ҳадаф аз баргузории ин давраҳо омӯзиш додани равандҳои навтарини тарзу василаҳои дӯхти либос ба кормандони маҳаллӣ буда, иштирокчиёни омӯзиш донишу маҳорати худро доир ба тарз ва раванди дӯхти либос сайқал дода, роҳҳои ноил гаштан ба натиҷаҳои беҳтар аз тариқи тағйир додани ҷараёни истеҳсолотро меомӯзанд. Дар баробари назария, гуруҳи иштироккунандагон бо тамринҳои амалӣ доир ба мудирияти кормандон ва методологияи баргузории давраҳои омӯзишӣ барои дӯзандагон фаро гирифта мешаванд.
Нантакумар Кандасамӣ, мутахассиси ширкати Skilift Consulting, мегӯяд, қарор аст, ширкаткунандагони ин давраҳо омӯхтаҳояшонро ба ҳамкоронашон дар корхонаҳо ва донишгоҳҳо омӯзонанд. Ӯ мегӯяд: “Ҳадафи мо таълим додани ҳамаи он чизе, ки доир ба мавзӯъи мазкур медонем, ба ширкатҳои дӯзандагӣ дар Тоқикистон мебошад. Бо истифода аз ин донишу малакаҳои нави ҳосилшуда, мо интизор дорем, ки маҳсулнокиии кор дар ширкатҳо то ба бештар аз 20% боло меравад”.
Бар иловаи давраҳои омӯзишӣ, мутахассисони Skilift аз 8-ум то 12-уми марти 2020 аз ширкатҳои шарики Маркази тиҷорати байналмилалӣ дар шаҳри Душанбе ва вилоятҳои Хатлону Суғд боздид мекунанд. Ба иттилои Нантакумар Кандасамӣ, қисмати бештари давраҳои омӯзишӣ дар шакли амалӣ баргузор мегардад. Дар ҷараёни ин боздидҳо, онҳо тарз ва раванди дӯхт дар ширкатҳоро таҳлил намуда, бо тренерони ояндаи дар дохили ширкатҳо шинос гардида, доир ба менеҷмент машваратҳо медиҳанд ва ҳамчунин, ба ширкатҳо кумак мекунанд то беҳтар шудани ҷараёни истеҳсоли маҳсулот дар корхонаро муайян ва арзёбӣ карда тавонанд.
Ҳадафа пешбурди содироти маҳсулоти нассоҷӣ ва дӯзандагӣ ва фароҳам овардани шароит барои дарёфти имкониятҳои даромад ва ҷойи кор унвон мешавад.
