Саҳифаи “2zabona” дар instagram мутааллиқ ба Аҳмадҷон буда, тариқи он ба ҷавонон ду забон-англисӣ ва чинӣ меомӯзонад. Инчунин ба шогирдони зиёде дар маркази забономӯзӣ дарс мегӯяд.
“Аз синфи панҷумӣ то кунун забони англисиро меомӯзам. Забони хитоиро замони донишҷӯӣ дар Чин омӯхтам.”, — нақл кард Аҳмадҷон.
Аз соли 2017 омӯзгорӣ мекунад. Дар ибтидо забони англисӣ меомӯзонид. Соли 2018 ба яке аз донишгоҳҳои Чин дохил шуд ва дар баробари касбомӯзиву забономӯзӣ дар боғчаву мактаб забони англисӣ ёд медод.
Аҳмадҷон аввали соли 2020 бинобар сабаби бемории ҳамагири COVID-19 ба Ватан баргашт ва фосилавӣ таҳсилашро идома дод. Чанде қабл донишгоҳи чиниро бо ихтисоси тиҷорати байналмилалӣ ва иқтисод хатм кард.
Қаҳрамони мо ҳоло дар шаҳри Кӯлоб ба хоҳишмандон забонҳои хитоиву англисӣ меомӯзонад. Ба иттилои ӯ, 80 дарсади шогирдонаш забони англисӣ меомӯзанд.
“Англисӣ -забони нисбатан осонтар аст ва аз ин сабаб таваҷҷуҳи мардум зиёд аст. Бо итминон мегӯям, ки дар шаш моҳ ҳар шавқманд метавонад асосҳо ин забонро омӯзад ва муошират кунад.”, — илова кард ӯ.
Ҳамсуҳбати мо мегӯяд, ангезаи пешбурди саҳифаи махсуси омӯзиширо дар Instagram аз Саъдӣ Тоирзода (маъмури саҳифаи zabonomuz) гирифт.
Аҳмадҷон ният дорад, ки дар Душанбе маркази омӯзишие таъсис диҳад ва дар баробари омӯзонидани забонҳои англисиву хитоӣ, роҳнамое барои дохил шудани довталабон ба донишгоҳҳои хориҷи кишвар гардад.
Ҳафизуллоҳ Тоҳирӣ
