Билол Сафарзода дар Дубай кору зиндагӣ дошта, айни ҳол дар тарабхонаи маъруфи “Бурак”-и Дубай ба ҳайси маъмур фаъолият мекунад. Гоҳо тарҷумонӣ низ менамояд, зеро, забонҳои русӣ ва англисиро хуб медонаду бо забони чинӣ низ гуфтугӯ карда метавонад.
“Дар Дубай кор зиёд аст. Вақте ба ин ҷой омадам, шарҳи ҳоламро ба чанд ширкат равон кардам, аз ҷумла, ба тарабхонаи “Бурак”. Пас аз чанде ба суҳбат даъват шудаму маро ба кор қабул намуданд.”, — нақл кард Билол.
Билол мегӯяд, вобаста ба мавсими сол, иду ҷашнҳо, рӯзҳои истироҳатӣ муштариёни тарабхона зиёду кам мешаванд.
“Бо маоше, ки ҳоло ман мегирам, агар ҳамроҳ бо хонавода дар ин ҷо бошам, кифоят намекунад. Вале ҳоло танҳоям, метавонам як қисми маблағро пасандоз кунам.”, — илова намуд Билол.
Билол ҳоло бо се ҳамватанамон дар тарабхонаи “Бурак” кор мекунад. Ӯ умедвор аст, ки забондониашро ба инобат гирифта, кори арзандатаре барояш пешниҳод мекунанд, дар ғайри сурат кори муносибтаре хоҳад ҷуст.
Билол то ҳол бо Бурак акс надорад, зеро, мувофиқи қоидаҳои тарабхона сурат гирифтан бо ӯ ва ҷойи кор манъ аст.
Қаҳрамони мо бо вуҷуди доштани имкониятҳои фаровон дар Дубай, ният дорад, ки пас аз як сол ба Амрико сафар намуда муддате дар ин кишвар кору зиндагӣ намояд.
Вале ҳамеша дар фикри бозгашт ба Ватан буда, мегӯяд, ҳоло ҷавон аст ва бояд таҷриба андӯхта, сипас онро баҳри шукуфоии Ватани азизамон истифода намояд.
Билол пас аз хатми риштаи тарҷумонии Донишгоҳи миллии Тоҷикистон ба Дубай рафт ва як сол мешавад, ки дар он ҷост. Ӯ замони донишҷӯӣ дар як маркази забономӯзӣ ва мактаб-интернат муаллими забони англисӣ буд. Идомаи матлабро дар мусоҳиба мушоҳида намоед:
Ҳафизуллоҳ ТОҲИРӢ
