Дастаи бонувони тоҷикистонӣ дар бозии охири хеш низ бо дастаи эронӣ ба ҳисоби калон мағлуб шуд.
Дар Дар Чемпионати CAFA оид ба футзал миёни бонувон, ки аз 21 — 28 январ дар Душанбе идома кард, дастаи бонувони тоҷикистонӣ 1 мусовӣ ва 5 бохт доштанд. Ба ин минвол, онҳо аз нишони биринҷии мусобиқаи CAFA бенасиб монданд.
Сабаби бохти пайи ҳами дастаи бонувони кишвар камтаҷрибагии бозингарон унвон мешавад. Онҳо танҳо тайи 10 рӯзи охир ба ин мусобиқа омода шудаанд. Инчунин аксарияти футболобозон аз футболи калон ба футзал ҷалб гардида, бозиашон натиҷаи дилхоҳ наовард.
Дар мусобиқаи Ассотсиатсияи футболи Осиёи Марказӣ (CAFA) дастаҳои бонувони Эрон, Ӯзбекистон, Қирғизистон ва Тоҷикистон ширкат варзида истодаанд.Чемпионати нахустини Ассотсиатсияи футболи Осиёи Марказӣ оид ба футзал миёни дастаҳои бонувон аз рӯи системаи даврӣ дар ду давр баргузор гардида ҳар як кишвар 6 бозӣ анҷом дод.
Бозиҳо дар Қасри теннис ва маҷмаии варзишии пойтахт доир гардид. Тими футзали кишвари мо зери роҳбарии Шамшод Ниятбеков ба ин мусобиқа омода шудааст. Дар даври аввал тими футзали кишвар бо хубони қирғиз бозиро мусовӣ (1:1) анҷом доданд. Баъди мусовӣ бо қирғизҳо Тоҷикистон дар бозӣ бо Эрон бо натиҷаи 12:0 мағлуб шуд. Сипас дар ду бозии дигар бо яккачини Ӯзбекистон аввалӣ 8:1 ва баъдӣ 5:0 мувоҷеҳи шикаст шуд. Дар даври 5 –уми бозиҳо тими мунтахаби футзали кишвар бо дастаи Қирғизистон дидор анҷом дод. Дар ин вохӯрӣ бонувони қирғизистонӣ бо натиҷаи 4:1 зафар ёфта, имконияти ба даст овардани нишони биринҷиро соҳиб гардиданд. Ҳамакнун пас анҷоми бозиҳо дастаи мунтахаби футзали занонаи Тоҷикистон ба дарвозаи худ 39 гол сар дода, се гол ба самар расонидааст ва бо доштани як имтиёз дар зинаи охири ҷадвали мусобиқа қарор гирифтааст.
Дар Чемпионати CAFA дастаи бонувони эронӣ бо ба даст овардани 16 хол Ҷоми мусобиқаро cоҳиб шуд.
Фаридун Сафарзода
