Save the Children дар таҳиқоқит нави худ мегӯяд, кӯдакон дар соҳаи киберспорт бо фишори равонӣ ва таҳдидҳои интернетӣ рӯ ба рӯ ҳастанд.
Мушкилоти хоб, фишори равонӣ ва озори интернетӣ аз ҷумлаи хатарҳое мебошанд, ки ба киберварзишгарони ноболиғ таҳдид мекунанд. Созмони байналмилалии «Save the Children» мегӯяд, ки бинобар набудани меъёрҳои ягона, ҳифзи ҳуқуқу саломатии онҳо дар ин соҳа ҳамоҳанг нест.
Саломатӣ ва некӯаҳволии кӯдакон дар мусобиқаҳои бозиҳои видеоӣ ба қадри кофӣ ҳифз намешавад.
Муаллифони гузориш аз соҳаи босуръат рушдёбандаи киберспорт даъват мекунанд, ки ҳуқуқи кӯдаконро, ки дар Конвенсияи СММ оид ба ҳуқуқи кӯдак муқаррар шудаанд, аз талош барои ба даст овардани натиҷаҳои баланди варзишӣ болотар гузорад.
Тибқи арзёбии муаллифони гузориш, дар саросари ҷаҳон то 300 миллион кӯдак ба бозиҳои интернетӣ машғуланд. Онҳо бо мушкилоти хоб, бемориҳои узвҳои такягоҳу ҳаракат, ҷинсиятгароӣ, изтироб, озори интернетӣ ва афсурдагӣ рӯ ба рӯ мешаванд. Ҳамзамон, тамринҳои пуршиддат вақти онҳоро барои таҳсил, оила ва муошират бо дӯстон кам мекунанд.
Дар гузориш таҳлили чатҳо ҳангоми 302 пахши бозии 20 стримери машҳури Twitch низ оварда шудааст. Натиҷа нишон додааст, ки дар 62 дарсади пахшҳо изҳороти ҷинсиятгароёна, дар 37 дарсад суханони нажодпарастона ва дар 84 дарсад ибораҳои таҳқиромез нисбат ба шахсони дорои маъюбӣ истифода шудаанд. Ҳамчунин, дар 97 дарсади пахшҳо таҳдид ё даъват ба хушунат ба назар расидааст.
Дар таҳқиқот, масъалаи ҷалби кӯдакон ба қабули қарорҳо, инчунин истифодаи ғайриодилонаи меҳнати онҳо аз ҷониби дастаҳо, агентҳо ва ҳатто волидон низ зикр шудааст. Ин ҳолатҳо метавонанд бо шартномаҳои ношаффоф ва тақсимоти нобаробари нуфузу имкониятҳо алоқаманд бошанд.
