Ҳукумати Латвия ният дорад ҳамаи аломатҳои роҳеро, ки номи маҳалҳои аҳолинишини Русия ва Беларусро нишон медиҳад, бардорад. Ин кор бояд на дертар аз 30 сентябри соли ҷорӣ ба анҷом расад.
Тибқи маълумоти Агентии давлатии роҳҳои Латвия, дар кишвар 235 чунин аломати роҳ насб шудааст, ки самт ба сӯи Русия ва Беларусро нишон медиҳанд.
Латвия бо вилояти Пскови Федератсияи Русия ҳаммарз буда, Тӯли умумии марз тақрибан 270 км аст. Дарозии марзи Латвия бо Беларус 172 км-ро ташкил медиҳад.
Роҳбари Шӯрои миллии расонаҳои электронии Латвия Иварс Аболинш изҳор доштааст, Латвия набояд фаъолияти радиоҳои русзабонро аз ҳисоби буҷети давлатӣ маблағгузорӣ кунад. Ба гуфтаи ӯ, ҳоло ҳамаи радиоҳои русизабон аз басомадҳое истифода мебаранд, ки моликияти давлат буда, ройгон дода шудаанд.
Қаблан ин ниҳод ба парлумон пешниҳод карда буд, ки фаъолияти радиоҳои русизабон дар давоми 8 сол тадриҷан қатъ карда шавад.
