Тақрибан 10% даромади солонаи Meta дар соли 2024 аз рекламаи қаллобӣ ва молҳои мамнӯъ ба даст омадааст.
Meta (Facebook, Instagram ва WhatsApp) дар охири соли 2024 то 10% даромади умумии солонааш, ки тақрибан 16 миллиард долларро ташкил медиҳад, аз намоиши таблиғоти қаллобона ва молҳои мамнӯъ ба даст овардааст.
Reuters бо истифода аз ҳуҷҷатҳои дар ихтиёрдошта собит кардааст, ки ширкат дар тӯли се соли охир натавонистааст мавҷи бузурги таблиғотеро, ки қаллобон, казиноҳои ғайриқонунӣ ва ғайра паҳн мекунанд, боздорад.
Платформаҳои Meta рӯзона то 15 миллиард таблиғоти “пурҳангомаи қаллобӣ”-ро нишон медиҳад. Ҳисоботи дигар нишон медиҳад, ки аз ин навъи таблиғот Meta солона тақрибан 7 миллиард доллар даромад ба даст меорад.
Сарчашмаи асосии ин қаллобӣ таблиғгароне мебошанд, ки системаи дохилии Meta онҳоро бо эҳтимоли баланд ҳамчун қаллоб мешиносад. Аммо ширкат танҳо дар ҳолате чунин таблиғгаронро мамнӯъ мекунад, ки алгоритмҳо 95% мутмаин бошанд, ки онҳо дар қаллобӣ даст доранд. Дар ҳолатҳои шубҳанок, Meta ба чунин таблиғгарон нархи баландтар мегузорад — ба гуфтаи ширкат, “то қаллобон аз идомаи фаъолият безор шаванд”.
Ин маълумот аз ҳуҷҷатҳои дохилии шӯъбаҳои молия, муҳандисӣ ва бехатарии Meta гирифта шудааст. Онҳо нишон медиҳанд, ки ширкат кӯшиш дорад миқёси сӯиистифода дар платформаҳояшро чен кунад, аммо ҳамзамон аз чораҳое, ки метавонанд ба даромадаш зарар расонанд, худдорӣ мекунад. Намояндаи Meta Энди Стоун изҳор дошт, ки ҳуҷҷатҳои дастрасшуда “танҳо як қисми воқеиятро нишон медиҳанд.
Ба гуфтаи ӯ, арзёбии дохилии 10,1% “тахминӣ ва аз ҳад фарогир” будааст, зеро ба ҳисоб “бисёре аз таблиғоти қонунӣ” низ дохил шудаанд. Ӯ рақами навтар пешниҳод накардааст.
Ба гуфтаи ӯ, дар 18 моҳи охир шумори шикоятҳои корбарон аз таблиғоти қаллобон 58% коҳиш ёфта, дар соли 2025 зиёда аз 134 миллион контенти қаллобона ҳазф шудааст.
