Низомиёни ИМА назорати ду танкери марбут ба «флоти соягии»-и Русияро бо номҳои «Bella 1» (ё «Marinera») ва «Sophia» ба даст гирифтанд.
«Тасарруф дар доираи дастури президенти ИМА анҷом дода мешавад, ки алайҳи киштиҳое равона шудааст, ки таҳти таҳримҳои ИМА қарор доранд ва ба амнияту суботи Нимкураи Ғарбӣ таҳдид мекунанд.», — омадааст дар изҳороти фармондеҳӣ.
Ҳар ду киштӣ дар рӯйхати таҳримҳои Вазорати молияи ИМА қарор доранд, зеро дар интиқоли нафти таҳримшудаи Эрон, Венесуэла ва Русия даст доранд.
Амалиёт субҳи барвақти 7 январ бидуни талафоти ҷонӣ ба поён расидааст. Дар баёния гуфта мешавад, ки амалиёт бо ҳамкории вазоратҳои адлия, амнияти дохилӣ ва мудофиаи ИМА пас аз он анҷом шуд, ки киштиро яке аз киштиҳои гвардияи соҳилии ИМА пайгирӣ кард. Тибқи иттилои расонаҳо, дар амалиёт нерӯи десантӣ иштирок дошт. Фуруд омадани онҳо ба танкер пеш аз расидани киштиҳои ҳарбии Русия ва як киштии зериобӣ сурат гирифт, ки каме пештар ба сӯи Marinera равона шуда буданд.
Вазорати нақлиёти Русия амалҳои ИМА-ро нақзи ҳуқуқи баҳрӣ номид. Тибқи меъёрҳои Конвенсияи СММ оид ба ҳуқуқи баҳрии соли 1982, дар обҳои кушод реҷаи озодии киштиронӣ амал мекунад ва ҳеҷ давлате ҳақ надорад нисбат ба киштиҳое, ки дар давлатҳои дигар ба таври қонунӣ ба қайд гирифта шудаанд, қувва истифода барад.
