Фунти нави Сурия муаррифӣ шуд. Ҳанӯз моҳи август хабаргузории Reuters иттилоъ дода буд, ки чопи пулҳои нави суриягӣ ба корхонаи давлатии Русия супурда шудааст. Ин корхона қаблан низ барои режими Башшор Асад пул чоп мекард.
Дар тарҳи нави фунти суриягӣ дигар акси одамон ё ёдгориҳо ҷой надоранд. Дар асъори нави рангоранг танҳо маҳсулоти кишоварзӣ — пахта, афлесун, гандум, зайтун ва ғайра тасвир шудаанд.
Қаблан дар пулҳои Сурия акси Башшор Асад ҷой дошт.
Ҳамчунин дар асъори ба тозагӣ нашршуда ду сифр ҳазф гардид.
Аз мардуми Сурия даъват шудааст, ки барои иваз намудани пулҳои нав шитоб накунанд, зеро ин метавонад ба қурби фунти суриягӣ таъсири манфӣ расонад. Дар тӯли як сол пулҳои кӯҳна ва нав ҳамзамон дар муомила хоҳанд буд.
Сурия ҳанӯз моҳи август эълон карда буд, ки аз моҳи декабр пулҳои навро бо ҳазфи ду сифр ба муомила мебарорад.
Дар натиҷаи 14 соли ҷанги шаҳрвандӣ, фунти суриягӣ беш аз 99 фоиз беқурб шуда буд.
Моҳи июн Бонки марказии Сурия инчунин аз анҷоми нахустин амалиёти байналмилалии бонкӣ тавассути низоми SWIFT пас аз оғози ҷанги шаҳрвандӣ дар соли 2011 хабар дод.
