Вазорати мудофиа 29 ноябр хабар дод, ки дар муҳлати муайянгардида ҳама комиссияҳои давлатии шаҳру ноҳияҳои мамлакат аз иҷрои пурраи нақшаи даъвати ҷавонписарон ба хизмати ҳарбӣ гузориш доданд ва нақшаи даъвати тирамоҳии даъвати ҷавонон ба сафи Артиши миллӣ пурра иҷро шуд.
«Аз 1 октябр бо оғоз гардидани даъвати тирамоҳии шаҳрвандон ба хизмати ҳатмии ҳарбӣ дар нахустин рӯзи даъват, аввалин шуда Вилояти Мухтори Кӯҳистони Бадахшон нақшаро пурра иҷро намудааст. Дар баробари дигар шаҳру ноҳияҳои ҷумҳурӣ, чаҳор навоҳии пойтахт низ яке аз аввалинҳо шуда, нақшаи пешбинишударо пурра ба анҷом расониданд. Шаҳру ноҳияҳои вилояти Хатлон низ бо масъулияти баланди шаҳрвандӣ иҷрои нақшаи даъватро пеш аз муҳлат амалӣ намуданд.»,-омадааст дар иттилоияи Вазорати мудофиа.
Даъвати навбатии шаҳрвандони солҳои таваллуди 1998-2007 ба хизмати ҳарбӣ 1 октябри соли 2025 оғоз гардида буд ва чун ҳамасола то 30 ноябр идома мекунад.
Акс аз сомонаи Вазорати мудофиа
