Ширкати амрикоии энержии Chevron қасд дорад тиҷорати «Лукойл»-ро дар хориҷ харидорӣ намояд. Дар ин бора Reuters бо истинод ба панҷ манбаи огоҳ аз вазъ хабар додааст. Chevron танҳо ба он қисме аз дороиҳо таваҷҷуҳ дорад, на ба тамоми портфели ширкат. Ҳамин тавр, ширкат метавонад ба пойгоҳи сармоягузории хусусии Carlyle ва дигар ширкатҳо ҳамроҳ шавад, ки барои харидории тиҷорати хориҷии «Лукойл» талош доранд.
Тибқи иттилои манбаъҳои Reuters, Вазорати молияи ИМА ҳафтаи гузашта ба харидорони эҳтимолӣ иҷозат дод, ки бо «Лукойл» дар бораи дороиҳои хориҷии ширкат музокирот баранд. Chevron низ метавонад ба ин раванд ворид шавад.
«Лукойл» тақрибан 2% истихроҷи нафти ҷаҳонро дар Русия ва хориҷ анҷом медиҳад. Ширкат эълом дошта буд, ки барои дороиҳои байналмилалии худ харидор меҷӯяд.
Reuters ҳамчунин хотиррасон кард, ки «Лукойл» се корхонаи коркарди нафт дар Аврупо дорад, инчунин дар як қатор кони нафт дар Қазоқистон, Ӯзбекистон, Ироқ, Мексика, Гана, Миср ва Нигерия саҳмдорон мебошад. Ширкат садҳо истгоҳҳои сӯзишворӣ дар саросари ҷаҳон, аз ҷумла дар ИМА, дар ихтиёр дорад.
ИМА 22 октябр алайҳи «Роснефт» ва «Лукойл» таҳрим эълон кард. Баъд аз ин «Лукойл» изҳор дошт, ки нияти фурӯхтани дороиҳои хориҷии худро дорад.
