Қирғизистон стейблкойни (пули миллии рақамии) худро ҷорӣ мекунад ва захираи криптоасъории миллӣ таъсис медиҳад. Ин кишвар ҳамчунин расман пули рақамии Бонки Марказии худро (CBDC) соми рақамӣ эътироф намудааст ва ният дорад онро барои пардохтҳои давлатӣ ба таври таҷрибавӣ истифода барад.
Дар ин бора ҳаммуассис ва собиқ директори генералии биржаи криптоии Binance Чанпен Чжао дар шабакаи X иттилоъ дод.
Ҳамзамон, соми рақамӣ, яъне пули рақамии Бонки Марказӣ (CBDC) Қирғизистон, мақоми ҳуқуқӣ гирифта, дар ояндаи наздик барои иҷрои пардохтҳои давлатӣ санҷида хоҳад шуд. Ин иқдом пас аз қарори президенти Қирғизистон Садир Жапаров роҳандозӣ шуд, ки моҳи апрел имзо шуда буд ва ба асъори рақамӣ мақоми расмии воситаи пардохт дод.
Қирғизистон на танҳо ба роҳандозии асъорҳои рақамӣ пардохтааст, балки инфрасохтори васеи криптоиро низ рушд медиҳад. Дар кишвар захираи миллии криптоасъор ташкил шудааст, ки ба он дороиҳое мисли BNB дохиланд, барномаҳои омӯзишӣ барои кормандони мақомоти ҳифзи ҳуқуқ роҳандозӣ шудаанд ва ҳамкории муштарак бо Binance Academy барои ҳамкорӣ бо 10 донишгоҳ оғоз ёфтааст.
