Метеорити бузургтарини марсианӣ NWA 16788 дар музоядае дар ИМА бо нархи рекордии 5,3 миллион доллар фурӯхта шуд
Метеорит бо номи NWA 16788 24,67 килограмм вазн дошта, порае аз рӯи сайёраи Миррих мебошад, ки дар натиҷаи бархӯрди як астероид канда шудааст. Онро як пайгиркунандаи метеоритҳо моҳи ноябри соли 2023 дар қаламрави Нигер (Ҳабашистон) пайдо кардааст.
«NWA 16788 бо қабати сурхча-қаҳвагине пӯшида шудааст, ки дар натиҷаи гудозиш ҳангоми парвоз ба вуҷуд омадааст ва ба он ранги хоси марсианӣ мебахшад. Дар рӯи он инчунин регмаглиптҳо дида мешаванд — чуқуриҳое, ки ҳангоми гузашта аз атмосфераи Замин бо суръати баланд ва дар натиҷаи соиш ба вуҷуд омадаанд», — омадааст дар гузориши хонаи музояда. Тағйироти ночиз дар таркиби ҷисмонӣ ва химиявии метеорит нишон медиҳанд, ки он «нисбатан ба наздикӣ ба Замин омадааст».
Ба гуфтаи коршиносони хонаи музояда, NWA 16788 тақрибан 70% калонтар аст аз дигар метеорити марсианӣ, ки қаблан дар Замин пайдо шуда буд. «Пораҳои Миррих ниҳоят нодир ҳастанд: аз беш аз 77 000 метеорити расман сабтшуда, ҳамагӣ 400 адади онҳо марсианӣ мебошанд.», — гуфта мешавад дар тавсифи лот.
Метеорити марсианӣ рӯзи 13 июл ба фурӯш бароварда шуд. Пеш аз он, он дар як галереяи хусусӣ дар шаҳри Ареттсои Италия нигоҳ дошта мешуд ва дар соли 2024 дар Оҷонси кайҳонии Италия дар Рум ба намоиш гузошта шуда буд. Sotheby’s номи харидор ва соҳиби қаблиро ошкор намекунад.
