Тарҳрезии дақиқи сохтмони метро дар шаҳри Душанбе моҳҳои июн — июли соли 2025 шурӯъ мегардидааст. Дар ин бора «Паёми Душанбе» — нашрияи расмии МИҲД-и шаҳри Душанбе хабар додааст.
Ёдовар мешавем, ки моҳи сентябри соли 2024 роҳбарон ва намояндагони вазоратҳои нақлиёт, корҳои хориҷӣ, рушди иқтисод ва савдо, молия, Кумитаи давлатии сармоягузорӣ ва идораи амволи давлатӣ, кумитаҳои иеъморӣ ва сохтмон, замин ва геодезии назди Ҳукумати Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе, КВД «Роҳи оҳани Тоҷикистон», ҶСП «Шабакаи интиқоли барқ», Сафорати Ҷумҳурии Корея дар Ҷумҳурии Тоҷикистон, ширкати «Роҳи оҳани миллии Корея» ба татбиқи лоиҳаи пеш аз асосноккунии техникию иқтисодии сохтмони метро дар пойтахти Тоҷикистон оғоз карда буданд. Ҳанӯз баҳори соли 2022 байни Вазорати нақлиёти Тоҷикистон ва ширкати «Роҳи оҳани миллии Корея» Ёддошти тафоҳум оид ба омӯзиши имкониятҳои сохтмони роҳи оҳани шаҳрӣ ва метрои сабук дар шаҳри Душанбе ба имзо расида буд, ки он барои бунёди инфрасохтори нақлиёти роҳи оҳани шаҳрӣ дар пойтахти Ҷумҳурии Тоҷикистон заминаи ҳуқуқӣ гузошт.
