Деҳаи зебоманзари Сабағ дар ноҳияи Масчоҳи Кӯҳӣ дар баландии 2350 метр аз сатҳи баҳр воқеъ гардидааст. Сойи Сабағ, ки дар наздикии ин русто ҷойгир аст, сангнигораҳои (петроглифҳо) зиёдеро то кунун дар худ ҳифз кардааст. Ин сангнигораҳо ба давраҳои гуногуни таърихӣ марбутанд. Тасвирҳо дар рӯи товасангҳои ҳамвори қаҳварангу сиёҳранг кандакорӣ шуда, хеле зич (дар як майдони 0,5 га) ҷойгир гардида, ҳудуди 1000 расми ҷудогона дар он тасвир ёфтаанд. Дар харсангҳо тасвири турҳо, бузҳои кӯҳӣ, камонварон, саҳнаҳои шикор, шаклҳои ҳандасии гуногун, шаклҳои антропоморфӣ, савораҳо, савораҳои камондор, аспҳо, аломатҳои мавҷнок, спиралӣ, доирашакл ва тасвири оинаҳо ҳаккокӣ шудаанд. Сангнигораҳои қадимтарин ба ҳазорсолаҳои III-II пеш аз милод муттаалиқ буда, дар онҳо тасвири турҳо ё барзаговҳо, чархҳо, оинаҳо, аломатҳои мавҷнок ва аробаҳои асри биринҷӣ кашида шудааст. Инчунин, ду катиба бо хатти арабӣ низ ёфт шудааст. Аксарияти саҳнаҳо кашидашуда як навъ композитсияҳои мазмунан мураккабро ташкил медиҳанд. Ин тасвирҳо дар рӯи санг бо асбоби филизии тез бо як маҳорати баланд ҳаккокӣ гардидаанд.
Соли 2009 сангнигорҳои Сойи Сабағ аз ҷониби экспедитсияи Институти таърих, бостоншиносӣ ва мардумшиносии А.Дониши АМИТ таҳти роҳбарии Бобомуло Бобомуллоев таҳқиқ гардида буд. Айни замон мақолаҳои илмӣ дар бораи ин мавзеи таърихӣ дар Тоҷикистон, Фаронса, Русия, Озарбойҷон ва Қазоқистон нашр шудаанд.
