Суҳроб Қурбонов аз дигар блогеру ютуберон бо пешниҳоди муҳтавои ғайриоддӣ фарқ мекунад. Ӯ мисли аксари ютуберон дар бораи Шоу бизнес ва варзиш намегӯяд.
Суҳроб тариқи саҳифаи хеш дар шабакаи Youtube, ки «Avto Life» номгузорӣ кардааст, бобати арзиш ва ҳолати техникии мошинҳо ба дӯсторон ва харидорони ин василаи нақлия маълумот пешниҳод менамояд. Бештари наворҳояш аз бозори фурӯши мошин (Мошинбозор) таҳия мешаванд.
Як навори бародараш сабаб гардид, ки ӯ ба ин мавзӯъ рӯй оварад.
«Қаблан дар фикри эҷоди саҳифае дар ютуб набудам. Боре бародарам чанд мошинро ба навор гирифта, тариқи ютуб нашр кард, ки зиёд бинанда пайдо кард. Ин кор ба ман ангеза бахшид ва бародарам низ идомаи ин корро ба ман тавсия дод. Он замон саҳифаамро «Қурбонов» ном ниҳодам ва теъдоди обуначиҳояш ба 70 ҳазор расид. Баътар номи саҳифаро бо «Avto Life» иваз намудам.«,- нақл кард Суҳроб.
Феълан саҳифааш беш аз 247 ҳазор обуначӣ дорад ва ҳамарӯза наворҳои нав нашр мекунад, ки дар як шабонарӯз аз 20-30 ҳазор бинанда онро тамошо мекунанд. Теъдоди умумии боздидҳо дар саҳифаи ӯ марзи 32 миллионро убур кардааст.
«Нафарони зиёде дар фикри харидории мошин ҳастанд, вале манбаи мӯътамад барои дарёфти маълумотро надоранд. Шахсан ҳолату арзиши мошинҳоро хуб мефаҳмам, вале бархе харидорон дар роҳи дур қарор дошта, аз куҷо дастрас кардани мошинро намедонанд. Ман беҳтарин мошинҳоро навор гирифта муфассал маълумот пешниҳод мекунам ва бовар дорам, ки харидорони зиёд тариқи саҳифаи ман мошинҳои дилхоҳашонро дастрас менамоянд.»,-мегӯяд Суҳроб.
Шабакаи Ютуб барои ютубероне, ки обуначӣ ва боздидҳои зиёд доштанд, маблағ пардохт мекард ва ин блогеронро ҳавасманд менамуд то ҳарчӣ бештар навор нашр намоянд. Баъд аз онки Ютуб аз пардохти маблағ ба ютуберони қаламрави Русия ва Осиёи Марказӣ худдорӣ кард, аксари ютуберон фаъолияти худро қатъ карданд.
Аммо Суҳроб ба кори худ идома медиҳад. «Даромад аз ҳисоби боздидҳо хуб буд, вале феълан шабакаи You Tube маблағ намедиҳад. Аксари ютуберон фаъолияти худро идома намедиҳанд. Агарчи барои ман низ сахт аст, аммо намехоҳам меҳнати 5-солаам бар абас равад. Инчунин обуначиҳоям, ки хеле зиёд ҳастанд, раҳо карда наметавонам. Ҳамарӯза беш аз 20 ҳазор обуначӣ наворҳоямро интизор мешаванд. Ба инхотир ба корам идома медиҳам. Умедворам, ки ютуб мавқеашро тағйир медиҳад.”,- мегӯяд Суҳроб.
Довуд Акобиров
