Бедил Шамсов меҳмони навбатии барномаи “Бол” аст. Ҳоло аспиранти Донишгоҳи тиббии шаҳри Уфаи Ҷумҳурии Бошқирдистон буда, ҳамзамон, дар беморхона кор мекунад.
Бедил дар Донишгоҳи давлатии тиббии Тоҷикистон таҳсил карда, гирандаи стипендияи президентӣ буд ва ин донишгоҳро бо дипломи сурх хатм кардааст. Ӯ кумаки аҳли оила, махсусан бародаронашро дар раванди таҳсилаш бисёр назаррас медонад.
Бедил мегӯяд, пас аз хатми донишгоҳ бо барномаи стипендиявӣ барои омӯзиши зинаи ординатура ба шаҳри Уфа сафар кард. Ду сол ин зинаи таҳсилро ба итмом расонид ва акнун аспирант аст.
Ӯ давоми таҳсил дар зинаи ординатураро, ки ба рӯзҳои сахти коронавирус рост меояд, каме қисса кард:
“Мо яке аз аввалин бачаҳое будем, ки дар он замони воқеан ҳам даҳшатбор дар баробари таҳсил ба фаъолият пардохтем ва ба мардум кумак расонидем. Агарчи аҳли оила дар ибтидо норозӣ буданд, зеро, коронавирус дар дили ҳама ваҳму ҳаросро андохта буд… Ҳамин тавр, баъде чанде беморхонаи моро расман макони ташхису табобати беморони коронавирус карданд. Дар ниҳоят соҳиби ифтихорнома аз ҷониби сардухтури ҳамин беморхона гардидам.”
Муҳоҷирони меҳнатии тоҷикистонӣ дар Русия зиёданд ва ба Бедил муроҷиат мекунанду ӯ то қадри имкон кумаки тиббӣ мерасонад.
Бедил пас аз хатми аспирантура ба Ватан баргаштанист то ба мардуми хеш хидмат намояд.
Ҳамчунин донишҳои андӯхтаашро бо таъсиси мактаби махсуси урологӣ ба донишҷӯёни риштаи тиббӣ қисмат карданист.
Ҳафизуллоҳ Тоҳирӣ
