Бинои маъмурии Институти астрофизикаи Академияи миллии илмҳои Тоҷикистон, воқеъ дар кӯчаи Айнӣ ифтитоҳ гардид. Бино аз чор ошёна иборат буда, ошёнаи якуми бино аз осорхона, хобгоҳи олимони ҷавон ва ошхона, ошёнаи дуюм ҳуҷраҳои кориро дар бар мегирад. Дар ошёнаи сеюм маъмурияти Институт фаъолият карда, ошёнаи чорумро толори маҷлисӣ ва синфхонаҳои тадрисӣ фаро гирифтаанд.
АМИТ «Ховар» аз қавли Фирӯза Раҳматуллоева, директори Институти астрофизика навиштааст, ки 60 фоизи кормандони институтро ҷавонон ташкил медиҳанд ва бинобар ин дар ошёнаи якум барои онҳо хобгоҳ таҳия гардидааст. Корҳои илмӣ-тадқиқотӣ берун аз бинои маъмурӣ дар расадхонаҳо ва пойгоҳҳои илмии Институти астрофизика, чун «Санглох» ва «Ҳисор» анҷом пазируфта, сафи кормандони соҳибтахассус дар бинои маъмурӣ 27 нафарро ташкил медиҳад.
Акс аз АМИТ «Ховар»
