Миҷгона Самадова, муштзани тоҷик, дар Ҷоми ҷаҳонии бокс миёни 19 то 40-солаҳо медали тилло ба даст овард.
Ин мусобиқа аз 7-ум то 11-уми декабр ба хотираи Қаҳрамони Меҳнати Сотсиалистӣ Фармон Салмонов дар шаҳри Нижневартовски Русия баргузор шуд.
Миҷгона Самадова дар рақобатҳо дар вазни то 57 кг баъди ду пирӯзӣ бар рақибонаш Мишидма Эрденеделай аз Муғулистон ва Моника Серафин аз Лаҳистон ба даври ниманиҳоӣ роҳ ёфт. Ӯ дар нимфинал Малика Шаҳидоваи русиягиро мағлуб кард ва ба финал баромад. Муштзани тоҷик дар муҳорибаи ниҳоаш Мунгунсаран Балсани муғулистониро шикаст дод.
Дар Ҷоми ҷаҳонии бокс миёни кишварҳои ихроҷкунандаи нафт, ки аз рӯи 13 дараҷаи вазнӣ миёни мардон ва 6 дараҷаи вазнӣ миёни занон сурат гирифт, 139 варзишгар (105 мард, 34 зан) аз 16 кишвар ширкат карданд: Беларус, Зимбабве, Лаҳистон (Полша), Кипр, Қазоқистон, Қирғизистон, Латвия, Молдова, Муғулистон, Озарбойҷон, Русия, Тоҷикистон, Украина, Чили, Ҷумҳурии Чех ва Эстония.
