Доналд Трамп гуфтааст, аз зарбаи ҳавоии Исроил алайҳи роҳбарияти ҲАММОС дар Қатар норозӣ аст. Ба иттилои euronews, Трамп аз маҳкумкунии ошкоро худдорӣ кардааст. Ӯ ба ҳамтоёни қатарияш итминон додааст, ки «ин гуна амал дигар дар хоки онҳо такрор нахоҳад шуд».
Рӯзи сешанбе нерӯҳои ҳавоии Исроил қароргоҳи ҲАМОС-ро дар пойтахти Қатар – Давҳа бо ҳадафи аз байн бурдани роҳбарияти баландпояи гурӯҳ бомбаборон карданд. Сарвазири Исроил гуфтааст, ин ҷавоб ба ҳамлаи террористии рӯзи душанбе дар Қудс буд, ки ҷангҷӯён ба мусофирони автобус оташ кушода, шаш нафарро ба ҳалокат расонданд.
Гуфта мешавад, зарбаи ҳавоӣ ба манзилҳои аъзои Бюрои сиёсӣ зада шудааст, ки барои баррасии пешниҳоди ИМА дар бораи оташбас ҷамъ шуда буданд.
Трамп шоми сешанбе изҳор дошт, ки иқдоми нахуствазири Исроил «якҷониба» буд. «Ман аз ин хурсанд нестам», — гуфт ӯ ва афзудааст: «аммо аз байн бурдани ҲАММОС, ки аз ранҷи мардуми Ғазза фоида мебарад, ҳадафи шоиста аст».
Ба таъкиди Трамп қарорро «Нетаняҳу қабул кардааст», на ӯ, аммо нахуствазири Исроил «сулҳ мехоҳад». Бо вуҷуди ин, расонаҳои исроилӣ бо истинод ба манобеъи худ хабар додаанд, ки маъмурияти президенти ИМА ба амалиёт «чароғи сабз нишон додааст».
Euronews менависад, ки роҳбарони аврупоӣ аз Исроил интиқод кардаанд ва ин ҳамларо «вайронкунии ҳуқуқи байналмилалӣ ва якпорчагии қаламравии Қатар» хондаанд.
Сухангӯи роҳбари сиёсати хориҷии Иттиҳоди Аврупо Кая Каллас гуфт, ки Иттиҳод бо «шарики стратегии худ» — Қатар, ҳамбастагии комил дорад. Фаронса, Испания ва Британия низ ҳамларо маҳкум карданд ва аз тарафҳо хостанд, ки хештандорӣ кунанд.
