Ҳузури чанд ҳампаймони Исроил, аз ҷумла Олмон дар нишасти Мадрид фишори афзояндаи байналмилалиро ба Исроил дар заминаи ҳамлаи нави САХАЛ ба Ғаза инъикос мекунад.
Ҳадафи вохӯрии рӯзи якшанбе, ки намояндагони тақрибан бист кишвари аврупоӣ ва арабиро ҷамъ овард, ин зиёд кардани фишор ба Исроил барои қатъи ҳамлаҳои низомӣ дар қитъаи Ғаза ва пешбурди масъалаи давлатдории Фаластин буд.
Нозирон таъкид мекунанд, ки иштироки чанд кишвари наздик ба Исроил, аз ҷумла Олмон, дар нишаст фишори афзояндаи байналмилалиро ба ин кишвар нишон медиҳад.
Ба иттилои euronews, пеш аз оғози вохӯрӣ Хосе Мануэл Албарес, вазири корҳои хориҷии Испания пешниҳод намуд, ки фавран амалишавии созишномаи ҳамкорӣ байни Иттиҳоди Аврупо ва Исроил боздошта шавад, инчунин рӯйхати таҳримҳои миллӣ ва аврупоиро, ки шахсони «монеъ аз таъсиси давлати пойдори фаластинӣ, мисли нахуствазири Исроил Бинямин Нетаняҳу»-ро дар бар мегирад, бознигарӣ кунанд.
«Манфиати ягонаи ҳамаи мо, ки имрӯз ин ҷо ҷамъ омадаем…, ин аст, ки ин ҷанги нобаробар, шадид ва бераҳмонаи Исроил дар Ғаза қатъ шавад, бастаи кумаки гуманитарӣ дастрас гардад ва ба татбиқи принсипи «ду давлат барои ду миллат» ниҳоӣ шавад.», — гуфтааст вазири корҳои хориҷии Испания.
Албарес таъкид кардааст, ки Гурӯҳи Мадрид, ки бо номи G5+ низ маъруф аст, ба сулҳ ва амнияти мардуми Исроил аҳамият медиҳад, аммо ҳамзамон таъкид кард, ки мардуми Фаластин низ ҳаққи баробар ба чунин амниятро доранд.
Вохӯрии рӯзи якшанбе панҷумин нишасти муштараки гурӯҳи дипломатҳо буд ва дар арафаи Конфронси сатҳи баланд оид ба татбиқи қарори ду давлат, ки Фаронса ва Арабистони Саудӣ дар миёнаҳои июн дар Ню-Йорк баргузор мекунанд, сурат мегирад.
Раиси Идораи миллии Фаластин Муҳаммад Мустафо изҳори умедворӣ намуд, ки президенти ИМА Доналд Трамп дар он ширкат мекунад ва Иёлоти Муттаҳидаро «як ҷониби муҳими манфиатдор дар Ховари Миёна» номид.
Дар аввали апрел Эммануэл Макрон изҳор дошт, ки Фаронса метавонад давлати Фаластинро дар ҷараёни конфронси июнӣ дар Созмони Милали Муттаҳид дар Ню-Йорк эътироф кунад, ки ба гуфтаи ӯ, бояд ба эътирофи Исроил аз ҷониби чанд кишвар сабаб шавад.
Дар моҳи майи соли гузашта Ирландия, Норвегия ва Испания давлатдории Фаластинро эътироф карданд ва як моҳ баъд Словения ба онҳо ҳамроҳ шуд, вале аксари кишварҳои ғарбӣ ин гомро нагузоштанд.
Соли 2020 «Созишномаҳои Авраам», ки таҳти сарпарастии Доналд Трамп дар давраи аввалини раёсати ӯ дар Кохи Сафед имзо шуданд, боиси муқаррар кардани равобит байни Исроил ва се кишвари арабӣ — АМА, Баҳрайн ва Марокаш гардид.
Аммо як қатор кишварҳои арабӣ ҳанӯз ба ин раванд ҳамроҳ намешаванд, ки дар миёнашон Арабистони Саудӣ, инчунин Сурия ва Лубнон, ки ҳамсоягони Исроил мебошанд, ҳастанд.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
