Вазорати тандурустӣ ва ҳифзи иҷтимоии аҳолии Тоҷикистон сарояндаи маҳаллӣ Қадами Қурбонро дар Пажӯҳишгоҳи гастроэнтерологияи Академияи илмҳо ба номи Ҳомид Мансуров бистарӣ ва ба табобати ройгон фаро гирифт.
Хабарнигори jom.tj субҳи 8 май Қадами Қурбонро дар ин пажӯҳишгоҳ аёдат намуд. Сароянда аз суҳбат дар рӯ ба рӯи дурбин худдорӣ намуда, вазъи сиҳатиашро хуб арзёбӣ кард.
Ба нақли Қадами Қурбон, баъди суҳбат бо блогерон, ки дар хонаи духтараш сурат гирифт, пайвандонаш дубора ба зодгоҳаш-деҳаи Чагами ноҳияи Шамсиддин Шоҳин бурданд ва Вазорати тандурустӣ тариқи ёрии таъҷилӣ аз ин деҳа ӯро ба Душанбе расонд.
Чанд рӯз қабл Қадами Қурбон ба блогерон шикоят кард, ки чаҳор моҳ боз аз дарди ҷонкоҳи қисмати рости шикам азият мекашаду касе аз дӯстон дари ӯро накуфт. Ӯ дар муроҷиат аз мухлисон ва мардуми Тоҷикистон кумак хост то дастгирӣ намоянд ва ӯ табобат гирад.
Репсарои тоҷик Шон МС дар репи ахири худ, ки ба Қадами Қурбон бахшидааст, аз дӯстони бевафои ин сароянда ва блогероне, ки бо истифода аз ҳузури Қадами Қурбон бинандаҳои худро зиёд намуда, даромад ба даст меоварданд, гила кардааст, ки дар бемориаш касе суроғаш накард. Зеро, ютуб дигар ба блогерон пул намедиҳад.
Довуд Акобиров
Акс аз навор
