Пешниҳод шудааст, ки барои рушди роҳҳалҳои зеҳни сунъӣ ҳамасола то 10 миллиард рубл дар шакли грант ва қарзҳои имтиёзнок ҷудо карда шавад. Ин тадбир на танҳо барои моделҳои «мустақил» ва «миллӣ», балки барои роҳҳалҳои нисбатан маҳдуди зеҳни сунъӣ низ пешбинӣ мешавад. Бизнес аз ин идея пуштибонӣ мекунад, аммо мунтазири меъёрҳои возеҳтару муфассалтар барои гирифтани чунин кумак аст.
Вазорати рушди рақамии Русия қасд дорад барои лоиҳаҳо дар соҳаи зеҳни сунъӣ тадбирҳои молиявии дастгирӣ ҷорӣ кунад, ки қарздиҳии имтиёзнок ва грантҳо барои озмоиши пилотии роҳҳалҳои зеҳни сунъиро дар бар мегиранд. Ҳаҷми умумии маблағгузорӣ метавонад ба 10 миллиард рубл дар як сол расад, 8 миллиард рубл барои таҳия ва 2 миллиард рубл барои иқтидори ҳисоббарорӣ.
Дар доираи механизми аввал ба созмонҳои русӣ тавассути бонкҳо қарзҳои имтиёзнок барои таҳия, татбиқ ва густариши роҳҳалҳои зеҳни сунъӣ пешниҳод карда мешаванд. Ин механизм ба барномаҳои амалкунандаи дастгирии соҳаи технологияҳои иттилоотӣ монанд хоҳад буд. Сохтори хароҷоти мақсаднок ба хусусиятҳои лоиҳаҳои зеҳни сунъӣ мутобиқ карда шуда, аз ҷумла ташкили инфрасохтори ҳисоббарорӣ, таҳия ва санҷиши маҷмӯаҳои додаҳо, инчунин омӯзиши иловагии моделҳоро дар бар мегирад.
Механизми дуюм — дастгирии грантии озмоиши пилотии роҳҳалҳои зеҳни сунъӣ мебошад, ки «шабеҳе надошта бошанд» ва барои соҳаҳои афзалиятноки иқтисод, бахши иҷтимоӣ ва идоракунии давлатӣ пешбинӣ шудаанд. Интизор меравад, ки оператори интихоби грантҳо Фонди рушди технологияҳои иттилоотии Русия (РФРИТ) бошад. Ҳаҷми грант метавонад то 80 фоизи арзиши лоиҳаро пӯшонад.
