Бо баҳонаи аз барномаҳои таълимӣ хориҷ кардани маводҳое, ки ба зӯроварӣ ташвиқ мекунанд, Вазорати маорифи Миср як қатор дарсҳои дар барномаҳои таълимӣ пешбинишударо ҳазф кардааст.
Тибқи иттилои Aljazeera, масъулони соҳаи маориф аз китоби таърихи Уқба ибни Нофеъ — фармондеҳе, ки сарзаминҳои Мағриби Арабро фатҳ карда буд ва омӯзиши он барои хонандагони синфи якуми мактаби миёна пешбинӣ шуда буд, 6 фаслро ҳазф карданд. Ин ҳаҷм тақрибан ба нисфи тамоми маводи дарсӣ баробар будааст.
Ҳамчунин аз барномаи забони арабӣ барои синфи панҷуми ибтидоӣ дарси марбут ба Салоҳуддини Айюбӣ, фармондеҳи низомие, ки Қудсро озод карда ва давлати Айюбиёнро таъсис додааст, хориҷ карда шудааст.
Сухангӯи Вазорати маорифи Миср Амонӣ Зарғам гуфтааст, ки вазорат ба хулоса омадааст, қисматҳои ҳазфшуда ба зӯроварӣ ташвиқ мекунанд.
Бахши сеюми фанни омӯзиши ҷомеашиносӣ барои синфи дуюми мактаби миёна низ бо номи «Хилофати исломӣ дар давраи Умавиён ва Аббосиён» аз барнома хориҷ карда шудааст.
Гурӯҳи кории ислоҳоти барномаҳои таълимӣ фаъолияти худро ба 30 китоби дарсӣ, ки дар соли таҳсили ҷорӣ таълим дода мешаванд, густариш додааст. Ҳамзамон, кор барои тағйир додани тақрибан 1290 китоби нави дарсӣ дар се соли оянда идома дорад.
Дар муқобил, дар нусхаҳои нави китоби омӯзиши ҷомеашиносӣ барои синфи сеюми мактаби миёна тавсифи «воҳиди сионистӣ ҳамчун душман» дигар вуҷуд надорад. Ба ҷои он дар бораи бартариҳои сулҳ, хотима додан ба низоъ ва таъсири мусбати он ба рушди Миср сухан меравад.
Исроил аз ин тағйирот истиқбол кардааст. Дар ин робита таҳқиқоте бо номи «Сулҳ бо Исроил дар китобҳои дарсии Миср» нашр шуда, ки дар маҷаллаи «Арзёбиҳои стратегӣ»,-нашрияи Пажӯҳишгоҳи таҳқиқоти амнияти миллии Исроил ба табъ расидааст.
Барномаи таълимии Амороти Муттаҳидаи Араб таҳаммулпазирӣ нисбат ба яҳудиён ва Исроилро ташвиқ мекунад, аммо Исроилро дар харитаҳо нишон намедиҳад.
Дар гузориши Пажӯҳишгоҳи мониторинги сулҳ ва таҳаммулпазирии фарҳангӣ дар таҳсилоти мактабӣ бо номи «Вақте сулҳ ба мактаб меравад: барномаи таълимии Аморот дар солҳои 2016–2021» 220 китоби дарсии арабӣ, ки дар мактабҳои давлатии синфҳои 1–12 истифода мешаванд, мавриди таҳлил қарор гирифтаанд. Ин китобҳо фанҳои тарбияи шаҳрвандӣ, таърих, адабиёти арабӣ ва таълими исломиро дар бар мегиранд.
