Раҷаб Раҷабов, Сардори раёсати муносибаҳои меҳнатӣ ва сатҳи зиндагии аҳолии Вазорат меҳнат мегӯяд, ҳоло 194 навъи кор барои занон манъ аст ва ин рӯйхат бознигарӣ шуда, номгӯи маҳдудиятҳо боз ҳам кам мешавад.То се соли қабл занон наметавонистанд ба 334 кор ё шуғл машғул шаванд. Ҳукумати кишвар декабри соли 2023 рӯйхати навро қабул кард ва баъзе маҳдудиятҳоро коҳиш дод, аммо манъи кор дар бахшҳои истихроҷи маъдан, нақбканӣ, кафшергарӣ, корҳои зери замин ва баъзе касбҳои техникӣ ҳанӯз боқӣ мондааст.
Ҳукумати Тоҷикистон рӯйхати корҳои “мамнуъ” барои занонро камтар кардааст. Агар то ин вақт 334 намуд кор барои занон манъ буд, пас ҳоло ин шумора то 194 кам шудааст.
Бар асоси ин феҳраст, занон ҳаққи кор дар бахши истихроҷи маъдан, кафшергарӣ ва нақбканиро надоранд. Аммо ҳомиёни ҳуқуқ аз ҷумла Созмони Милал вуҷуди ин рӯйхатро нақзи ҳуқуқи занон гуфта, борҳо аз ҳукумати Тоҷикистон талаб кардаанд, ки онро бекор кунад.
Кумитаи маҳви табъиз ва хушунат ба зидди занони СММ борҳо аз кишварҳои Осиёи Марказӣ аз ҷумла Тоҷикистон талаб кардааст, ки рӯйхати корҳои манъшуда барои занонро бекор созанд.
Бар асоси рӯйхати нав, занон наметавонанд харрот, пармагар, нақбкан, кӯҳкан, устои бомбпӯш, наҷҷор, челонгари барқӣ бошанд. Барои ҷалби занон ба чунин корҳо корфармо метавонад ҷавобгар шавад.
