Роҳбари дастгоҳи нахуствазири Британияи Кабир Морган Максвини ба истеъфо рафт ва масъулиятро барои он ба дӯш гирифт, ки маҳз ӯ тавсия дода буд Питер Манделсон, шахсе, ки бо Ҷеффри Эпштейн иртибот дошт, ба вазифаи сафири подшоҳӣ дар ИМА таъйин карда шавад.
Тибқи иттилои Sky News, лорд Манделсон моҳи сентябр аз вазифаи сафир озод шуда буд, аммо пас аз нашри ҳуҷҷатҳои нави Вазорати адлияи ИМА вобаста ба парвандаи молиявии амрикоӣ Ҷеффри Эпштейн ки дар маҷбур сохтани ноболиғон ба танфурӯшӣ гунаҳкор дониста шудааст, дубора дар маркази таваҷҷуҳи ҷомеа қарор гирифт. Ба назар мерасад, ки Питер Манделсон замоне ки дар ҳукумати Британия фаъолият мекард, ба Эпштейн иттилои махфӣ мерасонд.
Морган Максвини, ки яке аз наздиктарин ҳамкорони Кир Стармер ба шумор меравад, истеъфои худро бо он шарҳ дод, ки маҳз ӯ ба нахуствазир тавсия дода буд Манделсон ба вазифаи сафири ИМА таъйин шавад ва ҳоло мехоҳад масъулияти ин қарорро бар дӯш гирад.
«Қарори таъйини Питер Манделсон иштибоҳ буд. Ӯ ба ҳизби мо, ба кишвари мо осеб расонд», — таъкид кард Максвини дар изҳороти худ.
Морган Максвини маъракаи интихоботии Кир Стармерро замоне роҳбарӣ мекард, ки ӯ барои вазифаи раиси Ҳизби лейбористӣ мубориза мебурд. Кир Стармер дар изҳороташ оид ба истеъфои роҳбари дастгоҳаш гуфт, ки барои ӯ ҳамкорӣ бо Максвини «шараф» будааст.
Питер Манделсон, ки аз ноябри соли 2004 то октябри соли 2008 комиссари Иттиҳоди Аврупо оид ба тиҷорат ва аз феврали то сентябри соли 2025 сафири Британия дар ИМА буд, чанд рӯз пеш аз сафи Ҳизби ҳокими лейбористӣ хориҷ шуд. Ба иттилои The Guardian, сабабаш маълумот аз «файлҳои Эпштейн» мебошад, ки гӯё ӯ аз тоҷири бадномшудаи амрикоӣ 75 ҳазор доллар гирифтааст.
Ҷеффри Эпштейн солҳои 2008–2009 барои ташкили танфурӯшӣ ҷазо адо карда буд. Ӯ 6 июли соли 2019 бо иттиҳоми маҷбур сохтани ноболиғон ба танфурӯшӣ боздошт шуда, 10 августи ҳамон сол дар камераи зиндони Манҳеттен, ки дар интизори муҳокима буд, овехта пайдо шуд. Дар декабри соли 2025 қисми аввали ҳуҷҷатҳо оид ба парвандаи Эпштейн нашр гардид.
