Владимир Путин, Президенти Русия фармонеро имзо намуд, ки тибқи он дар соли 2026 барои шаҳрвандони Русия, ки дар рӯйхати захираи сафарбарӣ қарор доранд, ҷамъомадҳои махсус баргузор карда мешаванд. Ин нафарон ба ҳифзи иншооти аз лиҳози стратегӣ ва ҳаётан муҳим равона карда хоҳанд шуд.
Президенти Русия ба ҳукумат супориш додааст, ки рӯйхати иншооте, ки ба гурӯҳи ҳаётан муҳим дохил мешаванд, муайян намояд. Хароҷоти баргузории ин чорабиниҳо аз ҳисоби буҷети Вазорати мудофиаи Русия маблағгузорӣ мегардад. Тағйирот ба қонунҳои федералӣ «Дар бораи мудофиа» ва «Дар бораи ӯҳдадории ҳарбӣ ва хизмати ҳарбӣ» ворид карда мешаванд.
Дар аввали моҳи ноябр Вазорати мудофиаи Федератсияи Русия лоиҳаи қарореро дар бораи тартиби баргузории ҷамъомадҳои махсус барои нерӯҳои захиравӣ нашр кард. Дар он зикр мешавад, ки муҳлати будубоши нерӯҳои захиравӣ дар чунин ҷамъомадҳо набояд дар як сол аз шаш моҳ зиёд бошад. Давраи иштирок дар ҷамъомадҳо ба муҳлати хизмати ҳарбӣ ҳисобида мешавад. Барои вайрон кардани тартиби гузаштани ҷамъомадҳо, нерӯҳои захиравӣ ба мисли хизматчиёни ҳарбӣ ба ҷавобгарӣ кашида мешаванд.
4 ноябр Владимир Путин қонунеро имзо кард, ки тибқи он ҷалби нерӯҳои захиравӣ ба ҳифзи иншооти аз лиҳози стратегӣ муҳим дар замони осоишта иҷозат дода мешавад.
