Instagram ва Facebook-и ширкати Meta аз нисфи шаб дастрасии кӯдаконро масдуд карда, истифодаи онҳоро то ду соат дар як рӯз маҳдуд мекунанд
Instagram ва Facebook-и ширкати Meta ба зудӣ барои корбарони то 18-сола маҳдудиятҳои нав ҷорӣ мекунанд. Аз ҷумла, истифодаи ин шабакаҳо аз нисфи шаб то соати 6-и субҳ баста шуда, вақти истифодаи онҳо ба ду соат дар як рӯз маҳдуд мешавад. Ин тағйирот бахше аз созиши бисёрмиллиарддолларӣ миёни Meta ва мақомоти 48 иёлати ИМА мебошад.
Тибқи созиши бадастомада, Meta метавонад дар маҷмӯъ то 18 миллиард доллар пардохт кунад. Ширкат ин маблағро дар давоми даҳ сол пардохт хоҳад кард. Қоидаҳои нави ҳифзи кӯдакон танҳо дар ИМА татбиқ мешаванд ва аксари онҳо низ барои даҳ сол амал хоҳанд кард.
Тибқи қоидаҳои нав, истифодаи якҷояи Instagram ва Facebook барои наврасон ба ду соат дар як рӯз маҳдуд мешавад. Ҳамчунин, дастрасӣ ба платформаҳо аз соати 00:00 то 06:00 баста мешавад, агар волидайн ин маҳдудиятро бекор накунад. Дар соатҳои дарсӣ низ огоҳиномаҳои аксар барномаҳо барои наврасон хомӯш карда мешаванд.
Ҳамчунин, шумораи «лайк»-ҳо ва дигар вокунишҳо барои корбарони ноболиғ ба таври пешфарз пинҳон карда мешаванд. Meta инчунин қасд дорад истифодаи баъзе филтрҳои зебоӣ ва дигар имкониятҳоеро, ки барои кӯдакон номуносиб арзёбӣ мешаванд, маҳдуд кунад.
