Шаҳрвандони кишварҳое, ки бо Қазоқистон низоми бидуни раводид доранд, барои ворид шудан ба ин кишвар бояд иҷозаи электронии вуруд ба даст оранд.
Дар ин бора оператори платформаи QazETA (Kazakhstan Electronic Travel Authorization), ки тавассути он иҷозаи вуруд ба кишвар ба расмият дароварда мешавад, хабар додааст.
Иҷозаи электронӣ ба муҳлати 180 рӯз дода шуда, бо он метавон чанд бор ба Қазоқистон сафар кард. Арзиши иҷозаи электронӣ барои ҳамаи шаҳрвандони хориҷӣ яксон будааст. Маблағи дақиқи он ҳанӯз мувофиқа мешавад.
Аз 1 ноябр гирифтани иҷозаи электронӣ барои мусофирони хатсайрҳои байналмилалии ҳавоӣ ҳатмӣ мешавад. Аз 15 ноябр ин талабот ба шахсоне, ки бо мошин аз сарҳад бо кишварҳои берун аз Иттиҳоди иқтисодии АвруОсиё ворид мешаванд, татбиқ мегардад.
Аз 30 ноябр иҷозаи электронӣ барои гузаргоҳҳои автомобилии сарҳади Қазоқистон бо кишварҳои узви Иттиҳоди иқтисодии АвруОсиё низ ҳатмӣ мешавад. Аз 15 декабр ин талабот ба мусофирони қатораҳо ва шахсоне, ки тавассути бандарҳои баҳрӣ вориди кишвар мешаванд, ҷорӣ хоҳад шуд.
Вазорати корҳои дохилии Қазоқистон қаблан пешниҳод карда буд, ки ворид шудан ба кишвар барои шаҳрвандони хориҷӣ пулакӣ карда шавад.
