World Boxing санҷиши ҳатмии муайян кардани ҷинси варзишгаронро ҷорӣ мекунад. Санҷиши ҳатмии ҷинсӣ барои муайян кардани мувофиқати варзишгарон ба гурӯҳҳои мардона ва занона ҷорӣ мешавад, ки мехоҳанд дар мусобиқот ширкат варзанд. Ин санҷиш бахши сиёсати нави «ҷинс, синну сол ва вазн» хоҳад буд, то бехатарии ҳамаи иштирокчиён таъмин ва шароити баробар барои мардон ва занон фароҳам оварда шавад.
Бо назардошти расвоие, ки дар Олимпиадаи Париж соли 2024 рух дод, World Boxing ба Федератсияи бокси Алҷазоир нома фиристод, ки Иман Халиф то гузаштани санҷиши ҷинсӣ дар мусобиқоти занона, аз ҷумла Ҷоми Эйндховен ё дигар мусобиқоти World Boxing ширкат карда наметавонад.
Ҳоло ҳамаи варзишгарони аз 18-сола боло бояд санҷиши генетикии PCR-ро гузаранд. Бар асоси сиёсати нав, федератсияҳои миллӣ масъулияти гузаронидани санҷишро бар дӯш мегиранд ва бояд ҷинси варзишгарони худро ҳангоми сабти ном дар мусобиқот бо сертификати дахлдор тасдиқ кунанд. Агар сертификати натиҷаи санҷиши ҷинсӣ пешниҳод нашавад, варзишгар ба мусобиқоти World Boxing роҳ дода намешавад.
Ёдовар мешавем, ки Иман Халиф ва намояндаи Тайван Лин Юйтин дар маркази расвоии ҷинсӣ дар Олимпиадаи тобистонаи 2024 дар Париж қарор доштанд. Соли 2023 бар асари нокомӣ дар санҷиши ҷинсӣ варзишгарони Алҷазоир ва Тайван аз чемпионати ҷаҳон, ки таҳти унвони Ассотсиатсияи байналмилалии бокс (IBA) баргузор мешуд, маҳрум шуданд. Раиси IBA Умар Кремлев бе зикри номҳо гуфт, ки масъала ба натиҷаҳои санҷиши ДНК ва мавҷудияти хромосомҳои XY марбут буд.
World Boxing моҳи апрели соли 2023 таъсис ёфт ва алтернативаи IBA шуд. Кумитаи байналмилалии олимпӣ моҳи феврали соли 2025 World Boxing-ро ҳамчун созмони байналмилалӣ барои идораи бокси ҷаҳонӣ муваққатан эътироф кард. Март моҳи соли 2025 сессияи Кумитаи байналмилалии олимпӣ тасдиқ кард, ки бокс дар барномаи Олимпиадаи тобистонаи 2028 дар Лос-Анҷелес таҳти роҳбарии World Boxing баргузор хоҳад шуд.
Дар акс Иман Халиф. Манбаъ: шабакаи интернет
