Муҳаммад Ғанизода донишҷӯи факултаи фалсафаи ДМТ буда, ҳамзамон барномасозӣ, танзимгарӣ менамояду шеър менависад.
Ӯ барномасозӣ ва кори танзимро бо худомӯзӣ аз худ кард. Барномасозиро омӯхт то ашъори бобояш Сафармуҳаммад Аюбиро дар шабакаи интернет ҷой диҳад.
Охирин кори Муҳаммад-“Бӯстон”-и Саъдӣ Шерозӣ аст, ки дар шакли барнома дар Play Market ҷой дода шудааст.
Муҳаммад давоми ду сол 25 барнома таҳия ва дар Play Market ҷой намудааст. Ин корҳо ба 16 доллар суд овардааст. Вале ҳадафаш ба даст овардани фоидаи моддӣ набуда, балки хидат ба мардум аст.
«Кори мо душвор аст, барои омода кардани як барнома 10 рӯз то 1 моҳ вақт сарф мекунем. Аммо ин кори мо барои ҷомеа ниҳоят зарур аст. Ҳоло китоби “Фаъолияти оперативӣ-ҷустуҷӯӣ” -ро, ки муаллифи он вазири корҳои дохилӣ Раҳимзода Рамазон аст, дар шакли барнома омода дорам.»-нақл намуд Муҳаммад.
Муҳаммад бо тахаллуси Ғанизода Муҳаммади Кангуртӣ шеър менависад. Шеърҳояш тараннумгари Сулҳу Ваҳдат ва Истиқлолу Озодӣ буда, онҳоро Шоири халқии Тоҷикистон Рустам Ваҳҳобзода таҳрир менамояд.
Ҳ. Тоҳирӣ
