Роҳгузарон баёни ному насаби хешро бо имову ишора имтиҳон карданд. Барои ин кор устодони забони имову ишора ба онҳо кумак карданд. Ҳадаф ин буд, ки шахси шунаво тавонад садои дили ношунаворо шунавад ва дар ҳолатҳои зарурӣ кумак намояд.
Ин кор охири ҳафтаи гузашта, дар Боғи Курӯши Кабир сурат гирифт. Ёдовар мешавем, ки 8 октябр Рӯзи байналмилалии забонҳои имову ишора ва тарғиби забони имову ишораи тоҷикӣ дар Душанбе таҷлил шуд. Чорабинӣ дар ҳамкорӣ бо Мақомоти иҷроияи ҳокимияти давлатии шаҳри Душанбе, Ҷамъияти маюбони “Имконият”, Иттиҳодияи миллии ношунавоёни Тоҷикистон, Маркази рушди забони имову ишора ва омӯзиши ношунавоёни Тоҷикистон, Клуби варзишии IRBIS бо дастгирии Барномаи волоияти қонуни Барномаи Рушди СММ ва Вазорати корҳои хориҷии Финляндия баргузор гардид.
Дар он шумораи зиёди шахсони маъюбиятдошта, намояндагони созмонҳои ҷамъиятӣ ва сокинони пойтахт иштирок карданд. Чорабинии фарҳангиву варзишӣ бо мақсади ҷалби таваҷҷӯҳ ба омӯзиши забони имову ишораи тоҷикӣ ташкил гардида буд.
Забонҳои имову ишора дорои тамоми хусусиятҳои расмии забони инсонӣ мебошад. Он дорои грамматикаи бойи визуалии ба худ хос мебошад, ки онҳо забонҳои ҳар як фарҳанганд (забони имову ишораи универсалӣ вуҷуд надорад) ва аз ин рӯ онҳо рушд мекунанд.
Тибқи маълумоти Федератсияи умумиҷаҳонии ношунавоён, дар натиҷаи гуногунрангии фарҳангӣ дар ҷаҳон зиёда аз 300 забони имову ишора вуҷуд дорад.
Дар ҷомеаи ношунавоҳо, ҳам одамони ношунаво ва ҳам одамоне, ки бо онҳо муносибат мекунанд, илова бар ному насаби худ, аломати шахсӣ низ доранд, ки бо ин аломат онҳо муайян карда мешаванд.
Шодмон Кенҷаев
