Шурӯъ аз имрӯз, 19 октябр хатсайри Хуҷанд — Тошканд тариқи автобусҳои мусофирбар аз нав барқарор гардид. Аввалин гурӯҳи мусофирон аз терминали филиали ҶСП «Холдинги Осиё» ба Тошканд- пойтахти Ӯзбекистон ҳаракат карданд.
Ҳаракати автобусҳо аз шаҳри Хуҷанд ҳамарӯза аз соати 8 — и субҳ аз терминали собиқ «Сорбон» ё худ таксопарк оғоз мешавад. Аз ҷониби шаҳри Тошканд автобус соати 18 — и бегоҳ ба самти Хуҷанд ҳаракат хоҳад кард ва нархи роҳкиро аз як самт 100 сомонӣ муқаррар шудааст.
Ёдовар мешавем, ки Узбекистон бо ҳадафи пешгирӣ аз сирояти коронавирус марзҳои худро аз рӯзи 16-уми марти 2020 ба рӯйи хориҷиён баста буд…
Нашрияи “Ҳақиқати Суғд” менависад, ки Ширкати «Asian – Express» иқдомро амалӣ кард ва тасмим дорад ҳамарӯза мусофиронро аз шаҳри Хуҷанд то ба вокзали марказии шаҳри Тошканд расонад.
Икром Зокиров, директори филиали ҶСП “Холдинги Осиё» дар зимн гуфтааст, ҳамарӯза хатсайри Хуҷанд – Тошканд бе танаффус фаъолият хоҳад кард. Ҳоло аз шаҳри Хуҷанд ба шаҳри Тошканди Ҷумҳурии Ӯзбекистон 2 автобус ҳаракат мекунад ва дар оянда ҳангоми зиёд шудани талабот ва мусофирон ширкат имконият дорад шумораи автобусро дар ин масир бештар намояд.
“Барои сафар мусофиронро лозим аст, ки бо худ шиносномаи хориҷӣ ва сертификат оид ба иммунизатсия бар зидди бемории COVID – 19 — ро дошта бошанд. Дар ҳолати набудани сертификат онҳо имкон доранд ба маблағи 140 сомонӣ дар гузаргоҳи сарҳадӣ соҳиби сертификат шаванд.”, — гуфтааст Икром Зокиров.
