Ин робот ба «RoboCop»-и филми солҳои 80-уми монанд нест, на силоҳ дорад, на ҳуқуқи боздошт. Ба ҷойи қадамзанӣ рӯйи чарх ҳаракат мекунад.
Аммо дар як чорроҳаи серодами шаҳри Ҳанчжоуи шарқи Чин роботи қадаш 1,88 метр метавонад ронандаи дучархаи барқиро, ки кулоҳ надорад, муайян карда, ба ӯ боадабона огоҳӣ диҳад ва дастҳояшро ҳамоҳанг бо чароғҳои роҳ ҳаракат диҳад.
Роботи T2, ки 98 килограмм вазн дорад, аз ҷониби ширкати маҳаллии технологии SUPCON Information сохта шудааст. Он дар доираи як лоиҳаи озмоишӣ истифода мешавад, ки ҳадафаш вогузор кардани баъзе вазифаҳои такроршавандаи кормандони Бозрасии давлатии автомобилӣ ба мошинҳо мебошад.
Робот бо истифода аз камераҳо, радар ва низоми компютерии дохилӣ метавонад ронандагони бе кулоҳ, дучархаҳои барқӣ, мошинҳои аз хатти муайяншудаи ист убуркарда ва пиёдагардонеро, ки чароғаки роҳро риоя намекунанд, муайян кунад.
Истифодаи чунин роботҳои роҳнамо бахше аз талошҳои васеътари саноати Чин барои ба корҳои амалӣ ҷалб кардани роботҳо мебошад, то онҳо танҳо барои намоишҳои технологӣ ё пешвозгирии муштариён истифода нашаванд.
Роботҳо инчунин метавонанд ба саволҳо дар бораи самти ҳаракат, таваққуфгоҳ ва қоидаҳои ҳаракат дар роҳ ҷавоб диҳанд. Дар ҳолатҳои фавқулода низоми махсус корбарро ба кормандони маҳаллии полис пайваст мекунад.
Дастҳои ҳафтбуғуми робот ҳаракатҳои стандартии нозирони роҳро такрор карда, онҳоро бо чароғҳои роҳ ҳамоҳанг мекунанд.
SUPCON аз моҳи май дар Ҳанчжоу 15 чунин роботро ба кор андохтааст. Ширкат мегӯяд, ки онҳо беш аз 170 ҳазор огоҳӣ дода, ба коҳиши беш аз 40-фоизаи ҳолатҳои моҳонаи ронандагии дучархаҳои барқӣ бе кулоҳ ва убури мошинҳо аз хатти ист мусоидат кардаанд.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
